台語文~~~~~親子鄉土活動營記~~~~~遊子
佇西門國小每年1擺的親子鄉土活動營，今仔日又搁開始囉！天公伯仔真好心，叫日
頭公仔出來探著頭，互寒寒的透早，增加一屑仔溫暖，雖然講9點才正式開始，不過
，志工工作人員8點未到，就有人開始佇無閒啦！學生囡仔和in阿爸阿母，時間未到
嘛提早來鬥鬧熱，逐家遮行hiah走，活動的氣氛漸漸出現喔！9點未到，學生囡仔先
去報到領過關卡片，學生囡仔是有人有份，1家伙仔來幾個就有幾份‧
先由菊露先生做起頭開講，續落來是林校長摃大鑼起鼓，才換徐先生說明規劃活動進
行的內容和順序，講完全場的氣氛就攏碰碰叫囉！上頭先是學生囡仔的跆拳表演，團
隊動作真齊、真有力，各別的表演嘛真有看頭；續落來是學生囡仔的直排輪表演，共
款非常精彩，會當溜甲遮呢阿滑溜，實在無簡單‧2項表演節目，攏得到全場觀眾真
熱烈的拍撲仔聲‧續落來就是今仔日的主要親子活動起場啦！
即擺增加客家的部份，攏總有7關，上少愛過6關，上尾才會當換獎品喔！所有的關口
攏歡迎家長和學生囡仔做伙來完成，才符合親子活動的本意‧
(1).臆迷猜關：先抽1支籤仔，拍開看內底寫什麼，續落來由答案倒轉去查題目，才
用台語唸出正確的題目，講對才算過關‧
(2).剪紙做鼓仔燈關：現場有準備剪刀、色紙，有志工人員教囡仔做鼓仔燈，.剪逐
樣的春字；有作品完成才算過關‧作品會當紮倒轉去做紀念，過年時會當用‧
(3).台灣俗語關：先抽1支籤仔，唸出內底寫的俗語，續落來去四角箱仔堆，查出相
關的字，將所有字的順序排出俗語，上尾搁正確唸1擺，才算過關‧
(4).客家生活用語關：愛會曉用客家語，正確講出志工人員所指定的生活用語，才
算過關‧互囡仔佇生活中無困難應對‧
(5).釘杆轆關：有志工人員教囡仔釘杆轆，拍出來的杆轆會轉成功，才算過關‧
(6).日常用品關：愛會曉用台語抑是客家語，正確講出志工人員所指定的生活用品
的名，才算過關‧互囡仔佇生活中無困難應對，是實用的方式‧
(7).做砂包關：現場有準備細粒砂石仔、剪好的布料、針、線等等，由志工人員教
囡仔做砂包，1人做3粒；做好愛會曉戲：“1放雞，2放鴨，3分開，4相疊，5搭胸，
6拍手，7圍牆，8摸鼻，9扭耳，10拾起‧”喙一面喝，手配合隨人做好的砂包，由
1到10，完成動作才算過關‧
上少過6關的人，上尾仔就會當去換獎品；自頭到尾攏是笑聲無停，嘛有1家3代攏出
動的，佇親子活動進行中，有寡仔阿公、阿媽、阿爸、阿母比囡仔搁卡認真，佇囡仔
唸﹝勿會﹞出來，做﹝勿會﹞完全時，歸氣鬥講、鬥做卡緊，有影真趣味啦！
有時間的人，嘛順續去鄉土教室參觀，教室內收藏著真濟古早的日常生活用品，尤其
是“2、3.年級”以前的家長，看到攏真正懷念，因為，hiah的物件就是陪伴in成長
大漢的物件啊！看了後，會當講互in序細聽，這就是文化的傳承啦！
註：相關相片佇相簿內會當看到，歡迎參觀‧
全站熱搜
留言列表
