台語文~~參與囡仔兄囡仔姊講囡仔古的感想－jimmycmlin的部落格

台語文~~~~~參與囡仔兄囡仔姊講囡仔古的感想~~~~~遊子
頂一次，由桃園縣台語文化學會所辦的：阿公阿媽來講古比賽‧因為時間上袂拄好，
無法度臨場觀摩，聽講真精彩；這次的囡仔兄囡仔姊講囡仔古比賽，會當臨場參與，
機會實在真難得‧

在老師、家長和學生囡仔同齊湊鬧熱的情況，報名的真正濟，分做2組：高年級的是
4-6年，有47位報名，5位缺席無參加；低年級的是1-3年，有21位報名，只有1位缺
席無參加‧透早未7點時，聽講就有參加的學生囡仔來報到囉！啊！精神是真可嘉，
不過，有稍可仔卡緊張啦！亦是表示對這個活動的看重‧

現場有指導老師和家長陪伴學生囡仔來，所以，歸場看起來，大人比囡仔兄囡仔姊
復卡濟，邊仔的大人看起來嘛比學生囡仔復卡緊張的款‧
因為比賽的規則是：
聲調語法佔45%；講的內容佔45%；服裝儀態佔10%‧亦有時間是限制在4-5分鐘；時
間講超過亦是講無夠，每30秒扣總分1分‧每組由3位評審先生打分數，攏比賽結束
了後，3位評審先生打的分數，合起來做總平均排名，選出每組前6位排名上頭前的
參賽者，選定出前3名‧

學生囡仔的臨場表現大部份予人感覺真意外，因為in的表現實在讚啦！講古文章的
內容，當然攏是指導老師亦是老父老母寫作的，不過，聲調語法、內容，完全要靠
學生囡仔平常時的訓練，卡在膽的、卡活潑的，就會當表現著真自然，表情、手勢、
動作予人看到真古錐；有一半個仔復有化妝、攢道具，是有加強內容的幫助；憑良心
講，在表情、手勢、動作方面，囡仔兄囡仔姊的表現，比大人復卡好喔！時間的控制
嘛真要緊，看上尾仔排頭仔名的學生囡仔，攏是無予人扣分的‧

全部比賽結束時，評審先生在現場做講評：優點是真濟，像前仔講到的；缺點是希望
予所有的人，包括老師、家長和學生囡仔，攏會當做參考和以後來改進‧
(1).聲調音標要講予準和發予正，合唇音、鼻音、入聲音、8聲調和變調，攏是台語
的特色；語法和日常用語，需要茨內阿公阿媽亦是父母的湊相工，予學生囡仔在學校
內學台語，返到茨猶原有講台語的機會和環境，自然就學會曉正確的語法和日常用語
‧親像：蜜蜂就叫蜂、車站是車頭、自行車叫腳踏車鐵馬孔明車等等，語言是生活上
互相摯接的工具，是活的物件‧
(2).內容要予人聽到會感動、悲傷亦是歡喜到流目屎，囡仔古是欲講古予人聽，和演
講是無共的‧
(3).要配合內容做出表情、手勢、動作，毋通像背冊，企直直；聲音要有高低的變化
，聽起來才會自然復好聽‧