台語文~~婚姻－jimmycmlin的部落格

台語文~~~~~~~~~~婚姻~~~~~~~~~~遊子
在報紙看到無共人寫的短文感想：婚姻10大殺手；將投稿的資料整理起來，
排頭前10名的原因有：
(1).貧賤夫妻百事哀‧雖然講金錢非萬能，不過，散食無錢就萬事不能啦！
(2).管教囡仔的態度和方式，夫妻無相共‧
(3).夫妻中間有1位定定無欲講好話，出喙就請祖公、祖媽，攏是垃圾話‧
(4).夫妻中間有1位什麼攏好，干哪脾氣無好‧
(5).茨內大家和新婦的問題無法度調整好‧
(6).結婚愈久愈無羅曼蒂克的生活氣氛，愈來愈無味‧
(7).工作亦是事業關係，夫妻分開真遠，無法度蹛做伙生活過日子‧
(8).無欲幫忙分攤家事，茨內大小項事誌攏放外外‧
(9).對外好面樣講好話，對內歹面樣講歹話，無感覺有對方存在‧
(10).在公開的場所休辱對方，予對方受到真大的傷害‧

莫怪有人講：結婚是戀愛的墓仔‧經濟發展先進的國家，離婚率嘛愈來愈懸，
在日本復出現退休離婚潮喔！雖然世界社會的趨勢是按呢，不過，美滿的婚
姻猶原是佔大多數啦！逐家嘛毋免驚惶，抑無，金婚記念、鑽石婚記念，是
按怎樣做到的？
個人認為：婚姻是需要互愛、互信、互助、互敬，一直到百年歲老；嘛親像
2個人在人生的路途，參加著2人3跤的拐仔行比賽，其中1個人行傷緊抑是行
傷慢，攏袂用哩！一定要2人配合好勢，才有法度順序由頭行到尾‧所以，由
互愛、互信、互助、互敬的觀點來看，前仔的10原因婚姻大殺手，有影是無
法度合著標準，莫怪無法度互相牽手行到老‧

以前講門當戶對嘛毋是完全無道理，只是時代無共，想法標準要改變；古早
是有錢的家庭和有錢的家庭結親情，做官的家庭和做官的家庭結親情等等；
一般人嘛有講：買地看田底，娶某看娘嬭‧不過，即馬，是需要參考當事者
2個人的原生家庭，在為人處事的態度、教育的方式、經濟、理財的方式、
倫理道德的觀念、人生的態度和做法等等，事先互相瞭解予清楚，結婚後才
袂講事事1丈差9尺，才會當建立美滿的家庭啦！