台語文~~~~~冬節~~~~~遊子 冬節哪到食湯圓，細粒紅白甜甜甜；
大粒菇肉鹹芳味，食完準備好過年‧(七字仔詩)
是啦！每年陽曆的12月22日前後就是冬節；這工在咱蹛的北半球來講，
是日時上短，暗時上長的1工，因為日頭直射南迴歸線‧在傳統的曆法
嘛自早就有寫著：是日，斗指戊，斯時陰氣始至明，陽氣之至，北半球
晝上短，夜上長也‧
大大細細食過冬節圓仔，就算加1歲啦！寒天嘛真正到位囉！逐家準備
攢攢好過年‧在24節氣內面，算是大節氣喔！所以，古早的皇帝嘛在這
工舉行祭天大典，有時陣復實行大赦天下，予犯罪的人會使返去過年團
圓‧一般民間一定要團圓祭拜祖先，嚮望明年是好年冬‧俗語嘛有講：
冬節大如年；冬節無返是無祖，過年無返是無某；表示逐家對冬節的看
重‧
另外，和冬節有關係的一寡仔俗語，整理踮遮予朋友參考：
(1).未冬節嘛搓圓，無講是冬節‧(指毋是時機就已經做，mai講時機
到的時)
(2).冬節在月頭，欲寒在年兜，冬節在月尾，欲寒正二月，冬節在中
央，無雪亦無霜‧(指冬節在舊曆的頭尾無共時，對寒天氣候的影響)
(3).冬節烏，過年酥‧焦冬節，澹過年‧
(4).冬節無過無寒，夏節無過無熱‧
嘛有和冬節有關係的孽畜仔話，親像：
(1).1個人食圓仔：獨吞‧
(2).青瞑的食圓仔：心內有數‧
(3).圓仔炒大麵：膏膏纏‧(指糾纏不清)
註：俗語部份的(2)和(3)是前人生活中的統計資料，逐個罔參考看有
準無？
全站熱搜
留言列表
