jimmycmlin的部落格

台語文~~~~~回老友來批~~~~~遊子
小米蟲兄和米香嫂：闔府平安！
真歡喜，又復收到恁1年1次的平安批，嘛已經連續幾仔年囉！這比傳統的年節賀卡
更復有意思！感謝恁的來批，會使講是恁最近1年來美滿家庭生活的描述和你的建康
報告的分享‧有人講：人老有3項物件上要緊，老伴、老友和老本‧老伴指翁某，老
友無一定是共歲數的朋友，老本指身體康健和經濟保障‧有影耶！
恭喜你退休時陣，攏安排保持著真好；尤其這幾年來經過2次的重大手術，人講：先
生緣主人福‧平常時你的做人做事，總是予人真正會o-lo(稱讚之意)，所以，自有
貴人相綴，會當逢凶化吉；又復你的注重養生，信心堅強，家人全力支持，予你在
復健之路，會當順序行落去‧有影是予人真感心和歡喜啦！相信照按呢繼續行落去，
食到百貳無問題啦！


真濟身軀邊的親朋好友，無安排好退休的生活規劃，退休的日子顛倒無好過；看兄嫂
恁的退休的生活過著袂bai(不錯之意)喔！是啦！無閒歸半世人，過去攏奉獻予家庭
、社會，退休後是會使照家自的意思來：養生、健身、修慧、積福啦！
我雖然講是退休將欲6冬囉！認真講來算是半退休爾爾，所以，這6年來，並無放棄原
本的專業，不過，是有增加一寡仔時間，予阮翁仔某會使加減做淡薄仔社會事，日子
卡袂空虛無目標‧可能咱是共時代環境大漢的，想法無什麼精差，阮翁仔某的目標嘛
是：養生、健身、修慧、積福‧凡事看予開，凡事毋通毋甘捨，生活愈來愈簡單‧
投入台灣閩南語的志工教學，有影是一面教一面學，看到將欲熄去的台灣閩南語，在
後一代囡仔兄囡仔姊的嘴內講出來，抑準政策會當續落去推展，咱的台灣閩南語是有
救的，有希望的啦！阮翁仔某同齊做甲真趣味，真歡喜，有時貼錢來鼓勵學生囡仔嘛
無計較‧


另外，配合公會的政策，進行用藥安全、防制藥物濫用、反毒品防愛滋等等的宣導活
動，行入去學校內、社區民眾內、查埔亦是查某的監獄內等等，會使救若濟算若濟，
相信有淡薄仔效果啦！在宣導活動中，攏會強調咱每1人除了有銀行寄金簿子以外，
自出世就攏有1本人生的寄金簿子，逐人一直追求寄金簿子內的零愈濟愈好，不過，
毋管你的人生寄金簿子內有幾的零，上倒爿的數字，上無需要有1個”1”才有意義，
按呢，”1”代表什麼？”1”就是代表咱的健康啦！”1”無去啦！復卡濟的零嘛無
意義啦！親像聖經講的：1個人賺到全世界，失去伊家自，甘有什麼意義呢？聽到的
人嘛攏同意‧
在網路科技發達的時代，袂曉電腦和上網，變成青瞑網路人就真無採啊！親像你的專
業配合網路科技，做著非常讚！又建立LAIN友，真正好耶！阮翁仔某嘛是哪摸電腦和
上網哪學，嚮望會當扭著時代的腳步尾仔綴著行，所以，在無名部落格開有遊子的網
誌，加減認識寡仔網路頂的朋友，嘛順續瞭解網路世界li-li khok-khok(各式各樣
之意)的事誌；你的小米蟲園地嘛做著袂bai啊！科技的進步實在予人想袂到，真正是
無底深坑啦！
好囉！另日才復來講‧
祝闔府 新年快樂順序
遊子/悠思敬上