台語文~~同窗會－jimmycmlin的部落格

台語文~~~~~同窗會~~~~~遊子
少年人開同窗會是真歡喜，中年以後開同窗會是感傷參歡喜，相信是會愈來愈感傷才是‧
1967.8.一陣台灣逐所在的高中畢業生湊做伙，120位的查埔、查某囡仔，進入南台灣的
海洋城市，組織成KMCRx11的新團隊，內面有前15%的人放棄做醫生的選擇，每1個人復
卡有做齒科醫生、中醫師的機會，不過，攏歡喜選擇來行入未來人生的新路途；1971.06.
畢業時只賰108位爾爾‧畢業後隨人投入社會服務發展，有在國內外做學術研究的博士、
教授，有在教育界的教師、講師，有生理場的頭家、董事長、總經理，有行入政治界、其
他服務界，嘛有遷徙去外國發展等等，不過，逐個的基本身份攏共款是：頭殼頂戴草帽的
樂師啦(Pharmacist)！嘛是世界公認的1項專門職業行業，需要經過國家考試的檢覆，
和社會民生的關係真密切，自古到以後，毋管科技按怎發展，攏袂予時代放棄的必需行業‧
2001.08.畢業30冬時，由偉彥兄發起通知，在台北市圓山飯店辦1次卡正式的同窗會，中
南部的同窗嘛有人專工參加，出席的是3塊桌滿滿；即次由思源兄做東通知，以北部為主，
來有2塊桌，一目﹝目聶﹞就是30年，復一目﹝目聶﹞又是6年，時間在過實在有夠緊啦！
逐個久無見面，互相換位走來走去講袂煞‧逐個嘛欲進入耳順之年囉！知影已經有6~7位
同窗已經去天堂做仙啦！嘛感覺今後一定是健康囥上頭前，因為有幾仔位同窗經過大手術
，復原真好，又恢復信心；嘛有的需要洗腰子等來維護健康，總是在人生的寄金簿子，毋
管出現幾個”0”，當然愈濟愈好，但是，上倒爿上少要有“1”,這個”1”就是健康啦！
抑無這個”1”，就無健康，有幾個”0”攏嘛無意義，是毋是？

有人是已經放開退休亦是在半退休的情況，在職場繼續拍拼的嘛有計劃擴大；幾仔位(大
概有10外個啦！)已經是阿公、阿媽級囉！講到孫子逐個攏嘛笑瞇瞇！總是人生的階段啊！
不過，有2位gau做人的同窗，大漢囡仔的已經30外歲，幼的才5~6歲，父老囝幼，實在予
逐個欽佩！嘛受到逐個的祝福‧逐個講到過去在學校時的大小項事誌，攏真正趣味，笑聲
無停！現場的氣氛親像倒返去讀冊時：古董大教室、合系上課的大講堂、”黑格爾”、”
龜伯仔”上課點名的情形，實驗室、實習場所的li-li khok-khok，運動場、野外採藥
草等等，歸陣人的歲數隨減少30外歲啦！