台語文~~~~~家己種1叢較贏看別人~~~~~遊子 2010.02.19.
俗語講：人無照倫理，天無照天理‧1冬外來，全世界拄到金融的滾攪龍，咱台灣的政府無能力，予國內經濟真正悽慘，真濟人失業無頭路、趁無通食，社會人心驚惶，這是2次戰後上嚴重的1擺；阮茨尾頂的櫻花，可能受到全球天氣變暖化的影響，佇舊年10月底提早開花，這亦是頭一擺拄到，想講過年時是毋是會當閣正常來開花？
年底拼掃無閒，有1工夯頭看過去，哇~~!真正予人歡喜想未到，茨尾頂的櫻花，又閣踮枝頭來報春囉！雖然，3個月前已經提早開過一擺，即馬，猶原準時來報春，而且花莓閣較濟，大開的時陣一定非常嫷啦！
過幾工仔，頂真來相，哇~~!今年真正是無共的1冬，佇茨尾頂的小小的花園仔，竟然同齊出現幾仔種花：每年12月大紅的聖誕紅，是漸漸佇退場，賰著無認輸的，繼續將紅花企佇樹枝頂，隨著風[扌亥]來[扌亥]去；櫻花正是互相爭出頭天的時陣，開甲滿滿是，有孤單的花蕊，有閣較濟的是激做堆，變成1簇1簇的櫻花，大細簇佔著無共所在的樹掗頂，予規花園仔，變做鬧熱滾滾！一般是熱天才開花的巴西鐵樹，亦佇壁邊恬恬仔開花囉！亦看到覕佇青葉仔中的龍吐珠佮幼粒幼粒的桂花，不時會當鼻著桂花芳；亦有高高在上企佇半空中的九重葛紅花，配合著水青的天頂佮白雲，看來真影目‧
今年的新正，佇阮茨尾頂的花園仔，實在有夠鬧熱啦！抑準，滿山紅[杜鵑花]亦來開，就閣較心適啦！每年看到花園仔的花，就知影是什麼季節，無親像這擺，同齊來湊鬧熱，予人分未清到底是什麼時陣啊！
閒閒來種花草，只要有心來管顧佮整理，下肥、翻土、沃水、剪枝、分栽等等，年頭到冬尾，毋免出門，輪流有無共的嫷花通欣賞，櫻花、毛蟹蘭、滿山紅[杜鵑花] 、玫瑰花、龍吐珠、茉莉花、曇花、巴西鐵樹、咖啡樹的細蕊白花、桂花、九重葛的紅花、聖誕紅等等，真正像俗語所講：家己種1叢較贏看別人啦！
人講：天助自助者‧愛先自立自強才是正確的路途！事事看別人目色自然無前途啦！種花是按呢！國家經濟亦是共款意思，這個道理真簡單啊！
留言列表
