台語文~~安康是福－jimmycmlin的部落格

台語文~~~~~安康是福~~~~~遊子 2010.03.17.

舊曆過年前的某1工，牽手拄到厄運閃未過，坐著平平路的椅子來跋倒，想講稍歇睏觀察一陣就好，無二故，愈來愈疼，無法度行路，才心內驚惶，感覺代誌大條的款；趕緊麻煩二兄載來阿母暫時無用的輪椅，隨去病院掛急診‧

好佳載！急診處雖然人濟，抑無親像醫學中心的菜市仔款，醫生初步診斷後，隨聯絡骨科主治醫師來會診，翕電光完，病院亦綴著時代電子化，患者毋免等等電光片，阮倒轉到骨科主治醫師的所在，電光片已經放出來予醫生診斷囉！

醫生看著電光片講：啊！好佳載！只是尻川的大骨輪，佇碗型骨的所在有3公分左右的潷痕‧

阮心內驚惶，牽手緊張甲將未喘氣，大漢查某囝下班亦由台北趕到急診，陪伴佮安慰，阮問講：有真嚴重無？有要緊無？

醫生應講：看來是無要緊啦！無需要蹛院，嘛免拍鋼釘、免鞏石膏；毋過，暫時愛坐輪椅，未使胡亂行動，需要好好仔歇睏一陣仔，大約2個月左右啦！

聽完醫生說明佮吩咐，阮心內才較穩定落來，暫時免煩惱，牽手的喘氣亦比較有較平順；提著醫生開的藥單，先去地下室買4跤的行路輔助器，續落領藥仔後準備來轉茨囉！

哇~！阮是透天茨無電梯，只好去大漢查某囝[人因]兜借蹛，[人因]兜有電梯，出入行動才方便‧咱食老實在愛蹛1樓茨，亦是有電梯的才方便啊！嘛好佳載！大漢查某囝[人因]兜離無偌遠，有[人因]來替手湊照顧；毋過，阮翁仔某這擺毋哪愛分房爾爾，閣較愛分居一段時間啦！因為店內無紝看顧嘛未用哩！這亦是珊瑚婚以來頭一擺啊！

頭1禮拜3個查某囝輪流請假來看顧，無分日時暗暝，因為生活上牽手想欲做什麼，攏一定愛有人佇邊仔幫忙，顛倒我是食飯時間才過去做伙；一般人重男輕女，生著查埔嬰仔，大家攏真歡喜，生著查某嬰仔，就講嘛好！其實囝仔大漢才會知好[禾黑]，看到3個查某囝非常搭心，予阮翁仔某真安慰！誰講生查某囝毋好？前幾工媒體報導：現此時咱台灣毋哪少子化，閣較是少女化喔！因為傳統上猶原是重男輕女的關係，查埔嬰仔佮查某嬰仔的比率是110 ：100，表示查埔嬰仔比查某嬰仔較濟，比率超過世界平均的104：100，這無正常，亦表示大漢了後，真濟查埔的揣無某啦！其實真正是查埔佮查某只要會友孝、會搭心，是共款好啦！