jimmycmlin的部落格

台語文~~~~~急診處~~~~~遊子 2010.03.20.
嗚~咽~！嗚~咽~！嗚~咽~！
救護車親像用飛的衝到交流道邊某醫學中心的急診處，遮是人生生老病死的一大關口‧佇大門口只賰幾台輪椅爾爾，無半台通撐的急診眠床‧閣入去急診大廳，哇~~！無輸菜市仔佮大賣場，緊張的家屬sak著患者，真正是sa無寮仔門啦！
好佳載！有真濟穿著制服熱心的志工朋友，親切好心來引導初入來的當家屬佮患者，看是掛號、磅血壓、量體溫、排急診眠床的順序等等，亦做初步的判斷看需要轉去叨一科治療，才予家屬佮患者感覺較未驚惶，sa無粽頭‧
急診處內又分做幾仔區，內科、外科、外傷緊急處理區；醫生一手聽電話，目睭金金看電光片，喙問患者叨位無爽快，另外1個患者插欲問問題，醫師佇共1段時間真正是準做幾仔人來用，患者緊張、煩惱、艱苦，醫師實在亦頂真、緊張、無奈，連[口林]水、去便所的時間亦無‧
護理人員共款是無閒甲無通歇，講話親像機關槍，跤手攏細膩閣真猛，為無共患者抽血、注射、吊大筒、抽痰、罩san3-soh[華語的氧氣] 、抹藥仔、[扌焦]床位等等，親像18手觀音菩薩來救世人‧
因為患者濟，急診眠床無夠用，有家屬sak著患者去拜託事務員講：阮老母90歲囉！敢會當麻煩優先予阮老母排到急診眠床？
無閒的事務員用手一比講：毋是我毋幫忙，恁看坐著輪椅的叨一位毋是佮恁阿母頂下歲啊！大家亦是照順序來排啦！歹勢喔！
有影啦！伊講的無毋對，咱台灣真正是進入老年社會囉！佇急診處亦有影老大人佔多數，陪伴老大人患者的家屬，真濟嘛是頭毛白、坐車半價的中老年人啊！按怎養老真正需要好好思考、計劃、安排耶！
因為急診眠床歹等，好心的志工朋友播講叨位有涼椅通租，每工50箍，免用退還較方便，所以，佇候診區、行道邊仔、便所門口等等，攏會當看到患者撐著涼椅的情況，其實這亦是不得已的辦法啦！
雄雄看到1位查某患者予保全送入來，倒手用白色面巾包著，染有紅紅的血跡，面的表情真艱苦，隨予人轉入去外傷緊急處理區，準備隨做緊急手術，這是唯一看到入急診處隨做緊急手術的例，聽講是佇工廠做穡出意外，倒手予機器切斷去，需要佇幾點鐘內接倒轉，抑無，倒手就無救變殘廢啦！莫怪醫生護士攏跤手真猛來搶時間欲救患者‧這幕有影予人看著真感心！
另外，佇某1治療區的門邊，坐著椅輪頭仔le5-le5吊大筒，面色無好看來真無元氣，聽邊仔人講：伊家己1人來急診，醫生看完，護士來幫伊吊大筒，續落攏無人參伊，昨昏到即陣攏無食物件，只靠吊大筒爾爾，莫怪真無元氣，予人看著亦可憐‧聽伊講：雖然，行道上有人來來去去，叫聲一直攏無人參伊，來急診根本無路用，不如扭掉大筒轉茨好啦！其實會使吩咐志工來幫助伊，過無偌久真正無閣看到伊的身影，孤單1人入病院實在可憐‧
過路的行道上，空的急診眠床由病房送出來，隨有患者撐著閣送入病房，急診大廳攏嘛無空床放著閒；有亦久嘛有看到患者罩san3-soh的急診眠床，邊仔真濟家屬綴著行，1個佇床邊1下1下捏著雞[月圭]，由病房送出去大門口，阿彌陀佛！這就是無法度救的患者，留著1口氣欲送轉茨才予斷氣‧這段路是伊佇陽間上尾的路途‧阿彌陀佛！
看到急診處的答答滴滴，醫護人員認真拍拼救人，志工恬恬仔付出愛心來幫助家屬佮患者，大家有重病就走大病院，看到人生的生死關，嘛予人感受真深‧唉~啊！
咱台灣的健保制度是世界有名，雖然，制度設計毋是講非常公平，因為是以社會福利為出發點，需要改善的所在猶原非常濟，毋過實在講，咱台灣的健保是俗閣大碗啦！