用藥保健~~~~~喙臭的煩惱~~~~~遊子
佇咱日常生活中，濟少攏有拄過喙臭的煩惱，和人近身講話，邊仔的人就會鼻到喙臭的
味，家己嘛感覺真歹勢‧抑是長期間的喙臭，嘛可能是身體健康的黃燈警告訊號喔！
根據研究表示：有1成的喙臭是和喙以外的病症有牽連‧親像：鼻仔內受到感染、慢性
鼻竇炎、糖尿病、肝功能無好、肝硬化、尿毒症、腰子無好、癌症、肺管受到感染、新
陳代謝不良等，另外佇消化道的症頭嘛會造成喙臭，親像：胃腸無爽快、胃腸潰瘍、便
秘等等‧
一般拄到喙臭煩惱的問題，當然是先去予齒科先生看，按照齒科先生的診斷經驗表示：
大多數會發生喙臭的問題，是喙內原因引起的，親像：牙石真久無清除、喙齒縫的垃圾
無認真清除、蛀齒、牙周病、煙、酒癮真重等等‧每工食物件了後，抑是無隨時將喙齒
縫的殘渣認真清除掉，日長月久diau佇喙齒縫，沉落去牙周岸的肉內底，就變成喙齒的
結石啦！即個問題是上接拄到的原因‧
喙的臭味是來自幾仔種化學物質造成的，有一寡仔細菌會將喙齒縫的食物殘渣分解，新
陳代謝後，會變成VCS的氣體，所以，由VCS氣體的濟少會當做為喙臭程度的指標‧
bhue維持喙內的清氣，干哪用一般的齒抿仔絕對無夠，除了愛用正確的方式洗喙以外，
上好愛配合牙間刷﹝1種真細支的齒抿仔﹞，對喙舌頂面的舌苔，嘛愛清除予清氣，按
呢，才會當降低喙內VCS的氣體，達到一半以上‧
另外，卡重味的物件卡會引發喙的臭味，亦有就是喙內傷焦時，喙內的臭味會變卡重，
所以，愛卡接lim溫溫仔的滾水，嘛真有幫助‧有寡仔人愛用漱口水來減輕喙的臭味，
其實，用漱口水無一定就比用溫溫仔的滾水卡有效‧用漱口水時，嘛毋是講含佇喙內愈
久愈好，一般是含佇喙內30秒就好啦！有人一含就5分鐘，抑是定定攏按呢含赫呢阿
久，顛倒會造成喙內黏膜的潰瘍，有時會造成一片一片落落來，變成一種化學灼傷啊！
抑是長期繼續用漱口水，嘛有可能引起味覺退化、喙齒染色的問題，因為漱口水大部份
攏有酒精成份，是有刺激性‧正確的用法是：早、暗1擺，1擺用10cc,毋通含佇喙內超
過30秒，pui掉以後，毋免搁用清水lok‧建議上好毋通連續使用1年以上‧
留言列表
