jimmycmlin的部落格

用藥保健~~~~~生機食物~~~~~遊子
最近幾年全世界真流行生機飲食，什麼才是生機飲食？
生機飲食就是指日常生活中，食的物件、lim的物件，攏是有機食品，
而且是無經過加熱煮的生食，減少吃到人工加入去的干擾抑是受到污染
的食品‧所以，生機飲食就是生食有機食品的飲食生活方式‧
有機食品佇植物方面，愛遵守著：無施用化學肥料、農藥、除草劑等等
的農產品‧佇動物方面，愛遵守著：無飼化學成份的飼料、無注射、食
藥仔、攏是用有機飼料、而且是用放牧的方式，毋是關佇籠仔內抑是箍
仔底；亦有，愛用人道的方式屠宰，﹝勿會﹞當用灌水、摃昏去的方式
屠宰，愛用一槍彈死才續落去放血‧
生機飲食佇台灣互人界定做素食，食菜的‧其實佇全世界的做法，是廣
義的做法，植物動物攏包括在內‧所以，sasimi(生魚片) 、活跳蝦、
生的牛肉絲等等，攏嘛算是喔！
不過，生機飲食並毋是人人攏會當採用的，因為每人身體健康體質無共
，專家有提醒講：得到癌症和身體欠安、破病的人，本身的免疫力降低
，抑是食落無煮熟的物件，病菌、寄生蟲無法度tai死，對身體健康的
危害搁卡大喔！對健康的正常人來講，採用生機飲食的方式，是想hue
避免大魚大肉，加食寡新鮮青菜果子；抑是hue靠生機飲食的方式，來
tai死癌症細胞，就是真大錯誤的觀念和想法‧蹛院的患者，抑是自備
生機飲食，想講對病情有幫助，無愛接受正規的治療和營養指導，顛倒
會誤著病情，阻斷生機的恢復‧專家嘛建議，生機飲食的方式，愛慢慢
仔進展，1工中，上好以早起頓做生機飲食，抑是佇1頓中間，選1項菜
做生機飲食，而且愛囥佇上頭前食卡好‧