jimmycmlin的部落格

台語文用藥保健~~~~~健康食品症~~~~~遊子
現代人漸漸注重健康保養，對食品的安全嘛真注意，真驚去食到烏心食品、農藥、重金屬、致癌的化合物、
無好的油脂等等，這種對食品安全過度的煩惱，對衛生食品完美的追求，這種情形在醫學上嘛算是一種無
正常的症頭，有可能對咱身體健康帶來危害的新病症，在醫學上叫做”健康食品症”(Orthorexia)‧
你有注意到你身邊的人，有人只食”有機食物”(Organic food)，有機蔬果嘛一定要用清水沖洗幾仔遍，
嘛有人要用”蔬果清洗機”洗了後，才敢提來食入喙、吞落腹？遮個人”毋是健康的食品絕對毋食”，就是
即馬所講”健康食品症”的患者啦！
“Orthorexia”是希臘文，”Orexis”是胃口的意思，”Ortha”是正確、正當的意思；所以，合起來是
指：1個人干哪食健康食品所引起的飲食失調症‧﹝人因﹞對食品內含有若濟糖分、鹽分、油脂等等，攏真
計較，是毋是經過加工？是毋是經過基因改良？揀欲食的物件非常嚴格，抑無，甘願無欲食‧
親像按呢，過度嚴格來揀欲食的物件，到尾仔會造成一寡仔新問題出來‧上頭先是體重會雄雄減輕，因為身
體處在營養不良的情況，引起體內賀爾蒙系統無正常，出現無共的病症，卡嚴重時嘛可能造成器官衰竭來死
亡‧臨床上已經有即種病例出現囉！猶有是出現”社交孤立”的情況，因為對衛生食品完美的追求，心內驚
別人用特別的目色來看﹝人因﹞的做為，在人際互動關係中出現無順序，在日常生活和工作中攏會發生‧
要按怎來避免”健康食品症”的發生？
對食品好品質和安全性的要求絕對是有需要的，對咱健康的維護有幫贊；不過，時時過度的注意，處處嚴格
的要求，變成像神經質，顛倒是物極必反喔！才會引起”健康食品症”的發生‧所以，咱毋通為著避免1個
飲食風險問題，跳入去另外1個飲食的新風險問題。