台語文用藥保健~~~~~寒天的皮膚炎~~~~~遊子
小雪過去，玉山頂嘛落雪啦！東北季風愈來愈強，天氣嘛漸漸冷囉！
早暗溫差大，空氣卡乾燥，有人開始感覺皮膚癢癢，身軀洗好猶原癢，
一般人想講是洗無清氣，每次用雪文拚命洗，結果洗愈清氣皮膚顛倒愈
癢，嚴重的人皮膚會出現龜裂的樣，到底是為什麼會按呢？
即種症頭叫做寒天的皮膚炎，亦是寒天的濕疹啦！醫學上的診斷是：缺
脂性皮膚炎‧除了一般皮膚卡倚乾性的人以外，有糖尿病的人和洗腰子
的人，在寒天時一定復卡艱苦喔！有時陣癢甲擋袂tiau，抓甲破皮犯燙
，空喙潰爛，小事成大病；洗腰子的人，原本每工就是在欠缺水份的情
況，入到寒天復卡歹過‧一般人毋知是因為皮下油脂分泌減少在做怪，
所以，用雪文拚命洗，予皮膚的油脂洗甲空空空，愈清氣愈害，自然造
成寒天的皮膚炎啦！
咱欲按怎來避免出現寒天的皮膚炎？一方面洗身軀時，水毋通傷燒，差
不多60度就好；1禮拜用1次~2次的雪文就好；洗好隨抹油脂的保養品，
親像：嬰兒油(Baby oil)、羊毛脂油、保膚奶液等等，亦準是在浴缸
用泡的，會當將嬰兒油倒淡薄仔入去水底，同齊來泡浴；泡的時間嘛毋
通傷久，水共款毋通傷燒等等‧
真正無法度亦是要去予皮膚科醫生看，開藥仔來治療‧已經是寒啦！咱
逐個要保惜家自的身體健康喔！
註：犯燙(huan tung)華語是開始要化膿之意‧
文章標籤
全站熱搜
