jimmycmlin的部落格

(頂仔是塵螨的樣)
用藥保健~~~~~糞口蟲(蟯蟲)~~~~~遊子
媒體報導：產婦的空喙時常癢，怪醫生技術差，一檢查是糞口蟲做怪，還予醫生清白。
這實在是卡特別的例啦！
咱一般所講的糞口蟲，在華語叫做蟯蟲，醫學名是Oxyuriasis pinworm‧屬於蠕蟲
(Helminths)的1種‧伊主要是透過汙染的水、食物等等，經過手才來由喙口、鼻子進
入咱體內；蟲卵在咱體內的腸子內發育生長和寄生，大尾了後，看起來白色透明，母的
糞口蟲在暗時，尤其棉被蓋燒後，會溜到尻川口放卵，所以，會予人感覺睏燒了後，在
半暝仔定定尻川口癢，如果茨內人無注意，糞口蟲的卵會毣著內褲、被單、床巾、馬桶
蓋等等，又傳予其他茨內人；所以，感染的對象是以囡仔卡濟，不過，大人無細膩時猶
原會受感染‧
所以，養成好的衛生習慣真要緊，個人來講：食物件前一定要洗手，便所完嘛一定要洗
手，內衫褲要逐工換新‧茨內的被單、床巾、枕頭布等等，要卡勤仔換洗，出大日頭時
，上好順續曝曝著，除蟲殺菌效果卡徹底‧
茨內人抑是有受感染到的嫌疑時，上好無分大細漢，同齊來毒蟲；目前的毒蟲藥效果好
，治療時間短‧目前上倢用到的藥仔是Mebendazole 100mg / tab.這個毒蟲藥毋哪
對糞口蟲有效，會使同齊來毒鞭蟲(Giardiasis)、鉤蟲(Ancylostomiasis;
Hookworm)、蛔蟲(Ascariasis; Roundworm)攏真有效‧囡仔一般是半年毒蟲
一次卡好，必要時先去看醫生，需要用藥時，去問恁茨附近藥局的藥師，一定無
問題啦！