jimmycmlin的部落格

[這張是新竹內灣鐵支仔路支線的車廂]
新聞辭典~~~桃林鐵支仔路~~~遊子 2012.05.28.
媒體報導：桃林鐵支仔路停駛，年底熄燈，上班、就學通勤族慌跤手。桃林鐵支仔路佇叨位？為什麼來停駛？
桃林鐵支仔路是佇1968年正月起好通車，起點是桃園火車頭，行的路線經過桃園市、龜山鄉、蘆竹鄉，上尾仔到台電林口火力發電廠，全長有19.2公里‧
因為當初林口火力發電廠所燒的塗炭是由台中港落船卸貨，才閣由龍井塗炭場用火車載到桃園火車頭，續來由桃園火車頭轉桃林鐵支仔路運送到林口火力發電廠；近年來因為政府新開發的八里台北港完工囉！林口火力發電廠所燒的塗炭準備改由台北港來落船卸貨，才予桃林鐵支仔路走載車次愈來愈少，功能嘛強欲熄去啦！
桃林鐵支仔路算是縱貫線鐵支仔路的支線，通車後嘛帶動沿線工業區的發展，嘛有真濟沿線工業區的大間工廠提出申請專用的支線，上鬧熱的時出現8條專用的支線，親像：中油煉油廠、台鹽、糧食局等等‧
因為走載車次愈來愈少，桃園縣政府爭取轉型營運，經過鐵路局協調同意，佇2009年8月開辦客運到今，每禮拜的上班日才有發車，每工早起6點55分佮下晝17點10分兩班車，由桃園火車頭，經過桃園高中站、寶山站、南祥站、長興站、海山站到上尾仔海湖站；客運火車到尾仔海湖站了後，才閣返頭駛轉去桃園火車頭，每工總共4車次，往回大約需要1點鐘閣32分鐘‧自開辦客運到今，完全攏坐免錢的啦！
現此時因為桃園到中壢間的鐵支仔路欲改變為高架化，高架化工程開始進行後，限有地面上的鐵支仔路攏愛廢除，予桃林鐵支仔路無法度銜接著臨時的鐵支仔路，預定到2012年底就愛收攤停駛囉！
就按呢廢掉實在非常無採啦！民眾的願望第1是會當改變為輕便的捷運系統，每擺選舉前嘛攏予候選人提出來弄；桃園縣政府的意思是欲規劃做公車專門道‧
咱知影任何建設欲起較困難，欲拆廢除較簡單，桃林鐵支仔路就按呢來拆廢除，真正予在地人非常毋甘啦！