(頂仔是古早運送木材的輕便車紹介)
咱的台灣~~~~~烏來~~~~~遊子
烏來位在大台北市的郊區，是台灣北部真出名的山地鄉，位在水源保護區，
蹛在即所在的住民以泰雅族上濟‧聽講在300外年前，烏來這個區域是泰雅
族人打獵的所在，泰雅族人的祖先來到溪仔邊時，看到溪仔水一直在竄煙，
用手摸看覓，又是燒燙燙，歸陣泰雅族人就大聲喝講：烏來！烏來！烏來！
所以，烏來！就是會竄煙的燒水，嘛是後來逐家所講的溫泉啦！漸漸愈來愈
濟泰雅族人搬徙來遮蹛，所以，到今，烏來才保存著真完整的泰雅族文化，
遊覽的遊客會使看到古早原住民之一的的泰雅族人的生活智慧‧
(頂仔是內彎的輕便車)
烏來一直是台灣北部真出名的溫泉鄉，溫泉水質是弱鹼性的碳酸泉，水質非
常透明清氣，無色無臭味‧除了泡溫泉浴以外，嘛會使提來(口林)、治胃病
；來烏來佚佗的人，來泡溫泉洗身軀以外，嘛會使坐流籠起起落落，享受到
青翠的山景和真嫷的瀑布流水，古早運送木材的輕便車，嘛保留轉變做觀光
載人的輕便車，行在烏來的老街和瀑布腳的流籠車站中間，坐著遊覽是另外
一種趣味的感受‧在咱台灣猶原保留的輕便車，實在嘛無濟啦！
(頂仔是櫻花和泰雅圖騰)
烏來的四季景色嘛無共，春天是逐種櫻花上嫷的時陣，續落來是桃花、李子
花、杜鵑花、四時蘭花、秋天的楓仔紅葉、菊花、寒天的梅花等等；滿山隨
時配合著青翠的草仔和大叢樹，滿四界噴著瀑布流水的水霧，予人感覺真清
涼爽快‧實在是觀光遊覽的好所在‧
(頂仔是瀑布流水)
全站熱搜
留言列表
