jimmycmlin的部落格

咱的台灣~~~~~角板山公園~~~~~遊子 2008.02.26.
角板山公園位佇復興鄉，桃園縣13鄉鎮市內唯一的山地鄉，角板山是上原本的地名，
景色真嫷才規畫做公園，位佇角板山的南爿，後來嘛予人叫做復興公園，公園佔地真
開闊，行入公園時，上先看到2叢大樹的樹掗相連，親像2人彎身手牽手，變成1個半
圓型的迎客大門，這是蔣介石由中國退來台灣時，看到角板山的景色真嫷，親像伊的
中國故鄉，所以，起有別莊行館，彼2叢大樹仔就是伊佮伊的牽手同齊種落去的榕仔
樹‧公園內四季無共的花草，將欲鑽入天懸大的樹仔，坎跤是大科坎溪的溪水，嘛是
石門水庫的水源頭，水面有時懸有時低，水質清清清，有時有船行過，船尾的水紋變
成一幅圖；公園內空氣鮮鮮鮮，嘛有幾個涼亭仔，是歇睏泡茶開講賞景的好所在；公
園內亦有大型的雕刻藝術品，有現代式的，嘛有古典式的，實在嫷啦！
解嚴以後，蔣介石的地下指揮中心才開放予一般遊客參觀，是另外一爿坎跤挖出來真
長的磅空，親像大金門太武山的磅空，佇hit當時的工程來講，實在是無簡單啦！二
次大戰後，發生佇咱台灣真濟的代誌，攏嘛到解嚴以後才有法度予咱台灣瞭解！
角板賞梅是早期桃園8景之一，其實後來賞櫻花閣較受歡迎，公園邊的街仔路，真有
原住民店仔的特色，香菇、水蜜桃、甜柿、水梨、桂竹仔筍等等，攏是復興鄉的特產
喔！角板山公園值得逐家去行行，真濟人嘛毋止去1擺爾爾，只要去過的人，一定會
想閣再去啦！