jimmycmlin的部落格

咱的台灣~~~~~坪林~~~~~遊子 2008.04.06.
坪林位佇群山懷抱中間的山坑平地，四箍輪轉看過攏是青翠的樹林，所以才號做坪林‧
坪林是先人來開墾北台灣由台北盆地到葛瑪蘭中間真重要的所在‧上早完全是靠双跤行
路擔物件盤山過嶺，所以，古道真濟，草嶺古道到今猶原保持著，是歇睏日真熱門的健
行路線‧
後來開發出北宜公路，就是真正出名的9彎18斡公路，一無細膩就出意外的危險公路，
路上不時看到銀紙飛來飛去；坪林變成旅人貨車的歇睏站，西爿離台北市38公里，東爿
離宜蘭市42公里，屬台北縣的重要所在‧山坑仔的平地分別佇溪流溪岸的双爿，海拔懸
度大約200公尺，嘛是坪林鄉的住民主要集中的所在，亦是重要的水源保護區佮觀光休
閒的好所在‧
後來，北部濱海公路通車了後，分散寡車流，歇睏日嚴重塞車的情況有改善；2年前蔣
渭水高速公路開通了後，坪林交流道是欲管制抑是完全開放，是無法度做到抹壁双面光
的代誌！到底是欲管制遊客入來，顧好環保生態佮重要的水源保護區？抑是欲增加顧遊
客入來，好觀光休閒產業佮坪林鄉的住民生活提升？有影是淡薄仔困難‧當然，逐家守
規矩，實施部份管制坪林交流道的車流量，應該會使做到”一兼二顧，摸蜆仔兼洗褲”
啦！