jimmycmlin的部落格

莊子講(25)~~~土地公的樹仔~~~遊子
有1個木匠師，cua1陣師仔欲去齊國替人起茨，行佇半路仔，看到1間細間土地公廟的
邊仔，種著1叢真正懸大的大叢樹仔，伊的樹身愛幾仔人手牽手才有法度圍起來，樹仔
尾頂上懸的所在，像欲穿入去雲底啦！
木匠師看著，”哼”1聲，就繼續向前行，歸陣師仔就大聲喝：師父啊！師父，阮自綴
你學工藝到今，頭1擺看到遮大叢的樹仔，你是按怎無愛加看一下仔？
木匠師應講：啊！he無算什麼啦！伊根本就是1叢無路用的大叢樹仔爾爾‧抑是用伊
來造船，船會沉落去；抑是用伊來做器具、傢私頭仔，無夠堅固、無夠粗勇，抑是用伊
來做柱仔，會予蟲仔蛀去；伊根本就是無什麼路用，既然無路用，我加看一下嘛是無路
用啊！
佇共hit暗，木匠師做著1個奇怪的夢，伊佇眠夢中聽到日時hit叢大叢樹仔對伊講：
喂！喂！喂！今仔日你佇胡亂講什麼？你講我是1叢無路用的大叢樹仔爾爾？抑是我有
路用，早就予恁挫甲無看得影啦！我甘亦有法度活到今？企佇遮？抑是以樹仔的立場來
講，有路用的就愛卡早予人挫去用，卡早死啦！愈有路用愈早死；所以，顛倒是無路用
的樹仔，才會當有長歲壽，才是上讚的樹仔‧幾百年後、幾千年後，變成1叢予人or
lor的神木喔！
隔工醒了後，木匠師趕緊去向hit叢大叢樹仔會失禮，即馬，伊才知影大叢樹仔才真正
是有大智慧的樹仔‧