jimmycmlin的部落格

莊子講(49)~~~莊子夢到骷髏~~~遊子
有1次莊子欲去楚國，佇半路中看到1具骷髏仔‧伊恬恬企在骷髏仔邊，哪看心內哪想
講：你是毋是因為貪心才死的？亦是因為亡國時陣予刀劍﹝台刂﹞死的？亦是因為做
真濟歹事誌，驚連累著父母才自殺死的？到底是餓死的？亦是寒死的？亦是你的春秋
運途行到盡磅，自然躺佇這的？
日頭落山，天色暗囉！莊子就以骷髏仔做枕頭，倒落就睏，眠夢去‧
突然間，骷髏仔對莊子講：聽你日時所講的話，你親像是1個辯士喔！你所臆、所講
的理由攏是人生活在世間的累贅、負擔啦！是完全正確，不過，人死了後就攏無關係
啦！人死了後，無君、無臣，嘛無春夏秋冬；輕輕鬆鬆、快快樂樂，隨時和天地做伙
，天地的春秋就是我的春秋‧像即種快樂的感受，連做國王的嘛無得比‧
莊子聽了後講：我毋相信人死了後有影赫尼阿讚？我來請司命之神予你復活起來，還
你的父母、某仔囝，你欲無？
骷髏仔聽了後斡頭隨走離開，一面走一面大聲喝：我無愛啦！我無愛啦！
所以講：人的死亡是自然的大限；死了後到底會變按怎樣？實在嘛無人知影，應該用
自然的道理去想佮面對就好，毋通貪生驚死，人如果會當做到毋驚死，什麼事誌就好
講啦！