jimmycmlin的部落格

台語文~~~翠峰湖~~~遊子   2017.12.17.  (朗讀音檔：)

咱台灣的高山真濟，佇高山頂深山內亦有真濟大口小口的湖泊，一般叫做高山湖泊(Mountain Lake)‧咱台灣的高山湖泊又會當分為兩種類：一種是規年透天的水量攏是滿滿滇‧第二種是落雨期時陣才有法度看到湖面水波溢來溢去，渴旱期時陣就水量降低，有時亦會強欲見到湖底‧

因為高山湖算是獨立的湖泊，佮各大河流水系隔離無交參，所以，溯河性的魚仔類攏無法度溯泅到這所在‧湖邊長期受到四箍輪轉山坪仔水流沖刷落來的土流佮石頭仔影響，部份的岸墘漸漸變做較淺，又閣會堆積大量的有機物來變做沼澤地，出現生態豐富的水草類佮水棲昆蟲類，才閣吸引真正渡鳥、水鴨、鴛鴦等等來討食。

翠峰湖算是第二種的高山湖，現此時欲去翠峰湖佚佗是有夠方便啦！一般輕鬆仔行的行程是小巴將遊客載到入口停車場，落車後有整理好行的柴板仔路步道，行百外公尺就到闊闊闊的觀景台，會當欣賞著翠峰湖四季無共的嫷景緻‧出日頭的好天時，青翠的湖面親像一個大面鏡，四周美景倒印佇湖面，懸低的樹林、藍天白雲，渡鳥、水鴨、鴛鴦等等，無輸一幅彩色的油畫圖；遇到濛霧的機會真大，規年來講可能超過五成的時間喔！遇到濛霧就親像全湖區罩著一領薄薄仔的白頭紗，朦朧仔嫷，像新娘子歹勢見人共款‧寒天時四周圍的樹椏會結霜、結冰，大細的冰枝、冰柱，有時亦會落雪，全湖區變成北國的景色，白蒼蒼，冷吱吱，完全是毋免出國就會通享受到北國的景況‧尤其又閣遇到雲霧時開、時清、時合的時陣，閣較親像仙境喔！付大家的相機翕無停。

會記得頭一擺欣賞到翠峰湖的嫷，是1969年來採藥草的時陣，hit當時先搭乘三段流籠，日時去山區採藥草，行佇”蹦蹦仔”的鐵枝仔路頂，亦捌坐著”蹦蹦仔”的車斗頂，速度慢慢仔，吹著微微仔涼風，因為負[phainn7]採集的藥草，是省力省工又閣省行袂少路‧暗時蹛佇比一般工寮較齊全的太平山莊‧

有一工，教授帶領阮由大路邊的一個小缺口行入林仔內，林仔內的樹仔懸大，規片密密密，完全無法度看到天頂，地面又閣濕又閣全是草仔叢佮矮樹仔，完全無路跡，只有等阮規陣行過，才出現草仔叢倒落後的路痕；行上頭前的人，手夯長鐮仔，哪行哪剉哪開路，沿途愛真細膩真小心，抑無，就會跋倒‧差不多行二十外分鐘後，行出樹林外另外一頭，面前出現非常袂當相信的景色，無想到佇大片樹林的高山頂，竟然有赫尼阿大口的湖泊，湖水真清完全無受到任何的污染！湖面、湖仔墘會當看到真濟鴛鴦、水鴨仔、無知名的禽類等等，湖畔的水草生甲真旺真濟，這根本就是有夠嫷的一幅圖啊！

比起頭一擺看到的翠峰湖，雖然交通無方便，需要千辛萬苦才會當倚去欣賞，毋過是真正自然的生態區域，後來雖然改善交通佮步道建設等等，感覺是人工化囉！凡事真正是有一好無倆好啦！亦好佳載，咱大家的公德提升，保育觀念亦有落實，付翠峰湖清純自然的美景會當繼續保留萬代年。