台語文~~~跤跡(1)~~~遊子 2017.12.24. (附朗讀聲音檔)
看到櫥窗內紀念品，頭殼底又慢慢仔浮出一所在一所在的景緻囉！自退伍後開始踏入社會大學，為著立業成家來認真拍拼，囡仔細漢時，阮兩翁仔某閣較是無暝無日，俗語講：家和萬事興，烏塗變成金‧一直到千禧年，自服務27冬外的會社退休，阮兩翁仔某才開始計劃會當同齊去世界逐國佚佗的夢想，每去一個所在，亦攏會買一項細項物做紀念品，亦漸漸ho7櫥窗內紀念品愈來愈鬧熱囉！閒的時陣，看著一項紀念品，hit個國家的生活習慣、傳統民俗、藝術品、在地料理、路邊攤子美食佮嫷的風景等等，就寬寬仔浮出來啦！
咱先看著正中央倒手爿的白色狗仔，是第一擺去西歐佚佗時，佇高速公路歇睏站去便所時，每人需要先納5箍歐元，毋過會當抵用買物件的費用，使用者付錢的制度，ho7便所環境維持著真清氣，每擺看到這隻白色狗仔，自然想著歐洲的種種啦！
中央正手爿的白虎仔，是去韓國遊覽時買的；韓國人民族性強悍，歷史上雖然受到中國威脅影響，幾百年前就自創諺語文字，全面排棄漢文字，二戰後又閣完全排棄日本文字，所以，佇街仔路的廣告牌、大小看板攏只有諺文字，只賰去歷史博物館內才會當看到漢字的文獻、文物藝術作品等等‧日本人起的總督府，外型親像咱台灣的總督府，咱戰後改為總統府，繼續使用到今；韓國人是將日本人起的總督府完全拆掉，一磚一瓦嘛無留，另外揣所在閣重新起新總統府，就是全世界攏知的青瓦台‧由這所在亦看出韓國人佮台灣人民族性的無共，亦造成兩國佇二戰後無共的運命！想著咱台灣，心內實在真艱苦啊！
看到上頭前的幼磁仔茶koo2、茶杯仔組，亦有柴刻的鳥仔像，像麥仔酒杯的酒開仔等等，就想著日本的種種，古早日本是以中國唐朝為樣，自明治維新後，完全行離亞洲親西方的政策，尤其以德國為師，國力增強ho7全世界看會到，連續佇日俄戰爭、日清戰爭拍贏對手，國內人文、經濟、交通建設攏真先進，國民道德水準懸、遵守社會規矩，毋過，民間社會傳統，有的猶是真保守，表現出規的社會是先進佮保守併存的強烈比評；亦有日本文化是和漢字系統併存，後來閣加入的外來語一律以片假名(kadakana)標示，用著真順序，這嘛是ho7咱台語文未來生湠推展的方向，是真正重要的參考喔！
看到細雙又閣頭仔尖尖的柴屐佮細座風車，就想著荷蘭的種種；荷蘭佮日本攏是最近400年來，有文字記載開始，有管轄過台灣這塊土地，到今猶原有影響到台灣的國家，聽講佇歷史博物館內，保存著真濟佮台灣相關的歷史資料文獻喔！首都阿姆斯特丹市內運河四通八達，水運非常利便，地面交通有電車、公車、汽車閣真濟腳踏車，路線ho7人感覺規劃著真好，路邊停車區亦看到電動車欲充電的插座，對環境保護的觀念是行佇世界頭前，亦有落實環境保護的做法，佇遮是空氣清氣、風景嫷、國民對外來客嘛真客氣，感覺是一個好生活的所在‧
黃色紅圖形的酒矸仔蓋，就想著德國的種種；萊茵河是流經幾仔個歐洲國家的大條河流，流過德國的土地上闊，孕育著日耳曼民族特殊的歷史文化，即種大河文化是咱台灣所無的，頭尾坐過3擺無共段的萊茵河遊艇，沿途兩岸景色真嫷，河邊山頂佮半山腰看到真濟有無共造型的城堡，歷史上每一個城堡主就是該地區的頭人，會當向當地居民收稅，亦有保護當地居民安居樂業的責任，兩岸有長長的火車、公路汽車來來往往，凹澳仔地區攏有蹛人，有大小簇的莊落，攏有尖尾茨頂的教堂，遠遠就看會到，較大的莊頭就設碼頭區，ho7船隻會當倚靠，起落人員佮貨物等等‧山坪仔有真濟葡萄園，是生產葡萄酒真重要的產區；德國的汽車工業是世界出名，高速公路佇郊外區攏無限制速度，定定看到時速200公里以上由邊仔超過去，重型機車亦會當騎上公速公路，大家速度雖然緊，毋過攏照規矩行，所以，意外事故亦無濟啦！
看到上後壁的燕子形化石佮紅銅的玲瓏型酒開仔，就想著中國的種種，這等以後有閒才閣來紹介，因為猶有真濟其他所在的紀念品袂翕著耶！
留言列表
