jimmycmlin的部落格

台語文~~~孤蕊~~~遊子  2017.12.22.(附聲音檔)

茨尾頂的小花園仔，一年四季攏有應時的花蕊來報到，ho7小小的花園仔，展示著春、夏、秋、冬的輪替，有無共的景緻，ho7阮的日常生活加添be7少趣味‧

現此時是北風呼呼吹，寒流一陣一陣來，這幾工亦降到11~2度左右，往年這陣的小花園仔，應該是紅瞿瞿的聖誕紅，企佇懸懸低低的樹椏頂，ho7四周圍青翠的逐種葉子陪襯著，處處是青裡一簇一簇紅紅紅，佇冷凍的時陣，ho7人看著有燒燒溫暖的感覺‧亦ho7規的小花園仔變成真正嫷‧

今年亦到冬節囉！闊罔罔的小花園仔只賰一蕊聖誕紅，孤單企佇花園仔內守冬；因為今年熱天的風颱，將花園仔內的樹仔叢，掃甲東倒西歪，較懸的樹椏閣較食力，斷的斷，倒的倒，雖然風颱過後有重整理，照講聖誕紅是用插枝就會活，毋過愛對期，一般是冬尾春天時上拄仔好，熱天尾仔來插枝就be7赴囉！

所以，今年變做孤蕊啦！是上悽慘的一擺，看到以前上濟有到5~6拾蕊的相片時，心內是真無奈亦是無法度啦！其實植物亦是攏有情，只要平常時照起工好好仔照顧，應該沃水、落肥、翻塗、修枝、剪椏、掠蟲等等，in就照時間開甲嫷嫷嫷，無共色彩的大小花蕊ho7咱欣賞喔！