台語文~~惜物~~(遊子) 2017.12.20.
古早時咱台灣的經濟佇二戰後猶袂發展，大家的生活因為物資欠缺，生活較困苦，亦養成大家勤儉的好習慣，拼命加班趁錢，認食認做無怨言，食苦準做食補啦！毋過，自高雄港的加工區開始，台灣南北漸漸擴建真濟工業區，開始發展出口外銷的全民經濟，茨內亦加入為加工的所在，後來閣引入大賣場的服務業，尤其佇1989年時陣，股票市場衝到一萬二千外點，造成台灣錢淹跤目的表象，亦改變著台灣人原本勤儉的好習慣，日常生活出手變大把，用物漸漸看到奢華、討債的歹風氣，真濟人的想法亦變成想欲上班做穡離茨近，食好作輕可‧路邊時常看到好好的物件付人tan3掉，糞埽桶內亦定定看到猶會當食的物件，實在付人感覺真疼心‧
今年10月份有機會去日本東京佚佗，因為是自由行毋是綴團，時間上加真量上，除了去神社、神宮、風景區遊覽、食好食的料理、採買紀念品以外，亦有入去in的二手店參觀看看‧
哇！規模有夠大，規棟透天的幾仔層樓攏是，亦有流籠電梯，初初叫是百貨公司耶！每層樓的物件攏分類展售，大細項攏有，粗俗的、貴重的亦是攏有，衫仔褲服裝亦是齊全，3C製品、運動泅水、上山落海的用品，只要消費者需要，一定攏會當揣著‧唯一的共同點是攏總是二手貨喔！
店家的跤手亦真濟，收入來人客交賣茨內用過的任何物件，有一定的標準作業程序(SOP)，先檢查損壞情形、折舊度，是毋是會當修護閣再使用？來源是毋是清白無問題？續落來才估價做出成交價數，成交後才轉去整理維修部門，需要清洗、修理、修補等等，上尾仔全部檢查無問題，才推出上架付人客選買，只要感覺合用，價數攏非常俗，甚至有寡仔是古董的物件，親像：打字機、電報機、翕像機、隨身聽的收音機、錄音機、隨身看的電視、手錶、懷錶、計算尺、腳踏車、眠床、冊桌子、全實木家具、囡仔的傳統耍物、玩具、電動耍物、藝術品等等，實在講袂完啦！
這種人人惜物的精神佮現代企業經營的手腕，創作出遮大的二手貨市場，亦因為有即種公平的交易平台，付一般茨內定期拼掃出來的、囡仔大漢了後無欲閣使用的物件等等，攏通轉去交易平台，加減收淡薄仔所費倒轉來，亦擴大茨內的空間；經過交易平台，用心整理修護，又閣付合用的消費者會當用較俗的價數買去使用，對物件的循環利用，是充分做到減少糞埽，完全無拍損去啦！
咱台灣亦漸漸有類似的二手貨市場，只是猶袂達到即種規模，過往咱台灣逐方面是綴著日本的跤步發展，相信無外久，咱的惜物精神亦
一定會綴著世界時行的跤步，這亦是咱的福氣啦！
留言列表
