jimmycmlin的部落格

台語文~~~~~寒天的親情~~~~~悠思 (遊子整理)    
寒流一波一波來，氣溫嘛漸漸冷囉！
冷風吹著冷熠熠，行佇街仔路的人，
頷仔管的衫仔領，攏企甲直直直‧
但是，冷風共款灌入去，
冷甲每個人攏勼頭收尾，
頭仔犁犁趕緊行‧
即時陣，若有一條毛毛的、溫暖的圍巾，
圍佇頷仔管，毋知若好耶！
這時，阿母想起他鄉的囝兒，
隨去買一綑一綑的膨紗，
牽著老眼目鏡，攢好兩支鍤針‧
双手提好鍤針，就起工啦！
先揬一下，續落將膨紗線拋一下，
才又扭一下，才算一針‧
一zua鍤好，反過來搁鍤一zua，
總共鍤了6尺長才收針‧
兩爿邊仔搁結上無共色樣的流蘇，
一條嫷噹噹、燒烘烘的愛心圍巾鍤好啦！
鏡中的囝兒圍著故鄉阿母親手鍤的圍巾，
滿腹的歡喜，目箍紅囉！
嘛笑甲喙仔離腮腮‧
因為，伊佇冷吱吱的寒天時，
毋管是出門讀冊亦是上班，
毋管是行路亦是騎機車，
伊攏毋驚寒囉！
心內真正感謝~~
阿母的愛心陪伴伊！