台語散文：慈善心
佇台東海岸山脈的南爿，有布農族群生活的祖地，保留著原始的生態，做為巒山森林博物館，對外開放參觀活動，行入內底親像電影阿凡達的夢幻情境，予人感覺真爽快舒暢。
綴著導覽解說員進入過去布農族人打獵的山徑，密密密的樹林，一線天的岩盤壁縫，傷大箍的人是真歹擠過去喔！延途樹根彎彎曲曲，粗長大箍的籐條自頂垂下，山徑是斡來斡去，起起落落，前幾工有落雨過，路面滑溜滑溜，無細膩就會跋倒，規路雖有配置粗索仔維護遊客動線的安全，亦有粗索仔梯來爬上幾十尺懸的岩盤壁頂，是真刺激驚險佮趣味。
半途中，突然一個查某囡仔企著無轉動，面容蒼白受驚款，看起來是母女同齊參加活動，囡仔講伊會驚，毋敢繼續行，伊的阿母亦毋知欲按怎才好，進無路退無步，真正是進退兩難啊！
開始欲進入打獵小徑前，導覽人員有教所有參加活動者，準備簡單的貢品祭布農族祖靈，祈求全程平安順利通過！
親像祖靈也有保庇，一位勇伯仔彭先生出聲講：妹妹毋免驚，索仔先扭予好，續落來，抱起無助受驚惶的囡仔，交代囡仔將勇伯仔攬予牢，開始一步一步向前行，有的所在改用負佇尻脊𩩍，就按呢沿路亦抱亦負，一直行到安全的平路時才放下囡仔，這對母女是非常感謝勇伯仔的幫忙！前後做伙行的隊員，亦攏真敬佩勇伯仔的熱心、體力閣真正好、又充滿著慈善心！
勇伯仔彭大哥第一時間的見義勇為，真正予人感動，是阮團隊成員的上好模樣！
全站熱搜
留言列表
