jimmycmlin的部落格

台語散文：贖之嫷

佇中部地區有一位文化園區，佔地大約有十甲地，雖然幾十年來沓沓仔設計經營，聽講是今年才開始對外收費，開放買門票進入參觀.

氣派的大廳，大片的玻璃窗，由室內看出去，親像一窗一景，攏無共，攏真正嫷.

行出外頭的園區，真親像日本兼六園的感覺!

青翠的樹仔真濟，以主題設計的龍爿虎爿，毋是烏松就是青柏仔，用心剪椏造型，有幾百年的老叢，亦有幾十年的新栽.

亦收集著真濟叢紫檀，尚珍貴的有500年樹齡喔！算是鎮園之寶.

小徑邊仔有幼白石仔的無共禪境，是日本式的設計；亦有水池搭著柴橋，有小山佮小水淌流無停.

另外一個大水塘，四周圍寬闊青翠的草坪，是欲予人放空省思的所在.

亦看著落羽松林道，現時是青翠鮮綠，冬天寒流來也是換紅衫的時陣，是另外一種嫷的景緻；閣頭一次看到蒲瓜樹，蒲瓜（匏仔）一般是牽藤掛著竹架仔頂，即叢的蒲瓜（匏仔瓜）看來是親像柚子，掛佇樹椏頂喔！

另外一區是閩南建築，幾仔落，是好額人蹛的所在，亦是主人家族事業發基地.

踅完園區後，感覺主人家族的經營管理真用心，保留著真濟珍貴花草老樹、古早文物生活用品等等.園區主題是：孝親、敬業、家和萬事興、愛故鄉土地.

毋過，斡頭想著半世紀前南部地區多氯聯苯污油事件，亦有十年前的烏心油事件，對咱社會大眾造成的傷害悲痛，是非常嚴重佮深遠的影響！

所以，這個園區雖然嫷，亦有影真正嫷！

毋過，只會當講是贖之嫷啦！