台語散文詩：出航
坐著
由基隆港開航的台馬輪
港外稍可仔有風湧
船艙亦有淡薄仔搖晃
會暈船的
就倒佇眠床頂歇睏
頭殼底
比較著半世紀前
坐著大隻水鴨仔
隨著部隊
去金門做兵
大家攏佇船艙地板
一人一位
欲坐欲倒由在伊
現時的船隻
已經算真舒勢囉
當然
比起大型郵輪
是綴袂著
毋過
比起大隻水鴨仔
是真好啦
上甲板頂
吹著涼涼的海風
暗時
看到滿天的星光
四周圍
烏墨墨
完全無光害
是觀星上好的所在
日時
是看著
遠遠遠的海連天
有時陣
看著大貨櫃輪
大商船
來來去去
透早天未光
真濟人等著
迎日頭出
由雲層的空縫
射出金光閃閃
親像
金黃色卵仁
沓沓仔
探頭
半面
上尾仔
規粒圓圓圓
浮出海面
黃昏欲暗時
日頭落海
規片天
亦是
金光青光
交參射出
親像神蹟顯靈
又是佮透早
無共的天幕景緻
攏予人
歡呼不已
風平浪靜時
坐船亦是享受
看著
茫茫大海
予人心胸開闊
無論船隻大小
行佇海上
真正是親像樹葉
非常渺小
看著船尾的波涌
随着船隻向前行
雪白的水花
親像大板白絲帶
由寬轉細
愈遠愈細
愈遠愈幼
愈幼愈細
真正是
俗語所講
船過水無痕啦
全站熱搜
留言列表
