jimmycmlin的部落格

台語散文：做粿。2022.03.06.

舊曆過年拄過，元宵節亦過完囉！看到朋友翁仔某共心合作做菜頭粿予孫仔食，亦引起著我想著做囡仔的時，過年過節時，攏會無閒做逐種粿，拜拜以外，亦順紲予茨內大細塞喙空，彼時陣四秀仔真少，會當食著茨內阿母親做的粿，是真正歡喜佮幸福。

看現時做粿是有夠簡單啦！逐種料攏攢便便，開錢買就有，做起來真省工；想著細漢時，年節前欲倚前幾仔工，就開始無閒攢料，看著茨內大人愛先浸米、才去茨邊隔壁有石磨仔兜排隊，用石磨仔挨米，一個佇邊仔出力挨，一個企佇石磨仔邊倒水佮米，配合挨的速度，一擺加拄仔好，傷濟傷少攏會有意外，囡仔人圍佇邊仔看甲真趣味，想講是簡單隔好耍，其實挨的人是真食力，挨完攏腰痠背痛；沓沓仔白色米漿一港一港流入麵粉袋仔底，上尾仔綁好袋仔口，才囥佇長椅條仔壓乾，做年粿、紅龜粿、草仔粿、麻糬⋯，攏是照按呢步數。

毋過，發粿、菜頭粿是毋免壓乾，以做菜頭粿來講：直接將磨幼/切絲的菜頭佮蝦米🦐加入挨好的米漿桶，出力攪予平均，才倒入炊床，囥佇大灶頂炊熟！大灶的火愛顧予好，傷旺會臭火焦，傷細炊袂透⋯.火喉佮時間掠予好，炊熟是芳絳絳。

囡仔人佇邊仔目睭金金看，鼻著芳味喙瀾強欲留落來，欲試食時攏亦有看有份，亦會當先食一喙⋯嗯！讚👍啦！

古早四秀仔非常少閣稀罕，會當食著菜頭粿、逐種粿，算是真幸福耶！

（感謝張先生賢伉儷提供相片）