jimmycmlin的部落格

台語文新聞辭典~~~監理沙盒~~~遊子   2016.10.24

.

媒體報導：標榜金融創新的”監理沙盒”機制，毋哪朝野立委推動修法，連蔡總統亦表態支持，佇新任金管會主委李瑞倉就任後可能有希望來加速推行‧

一般所講的”監理沙盒”(Regulatory Sandbox)，是一種創新的機制，為著因應快速發展的金融科技趨勢，允准佇一定的範圍內，予金融業者會當測試創新的產品佮服務‧

是按怎欲叫做”監理沙盒”(Regulatory Sandbox)？其實”沙盒”這個名詞是來自IT資訊科技業，是指工程人員佇分別隔開的環境下進行試驗程式；由這個概念引用來金融業，表示允准業者佇一定的範圍內，予風險會使控制管理，佇主管機關監理下，將創新的產品佮服務進行測試，上重要的是暫時享有法規限制的豁免權‧

佇程序上，主管機關根據業者申請的個案進行准駁，進入”監理沙盒”後，申請者必須隨時向主管機關報告成效，並接受指導佮輔導；等到”監理沙盒”完成試驗，申請者會當根據測試結果進行修改，並佮主管機關討論產品是毋是會當上市‧

總是講，對業者來講，”監理沙盒”除了會使用暫時排除法規限制，亦會當節省產品直接上市的成本‧

佇實際的適用上來看，親像國內第三方支付業者，如果想欲用閣較創新的模式進行開戶佮儲值，佇現此時的法規限制是無允准，這個時陣，業者會當提出申請進入”監理沙盒”試驗，并亦接受主管機關輔導；其他新種類的金融科技，親像P2P個人網路借貸平台等等攏會當適用。