台語文~~~~~河洛語的教學心得~~~~~遊子
2001年自公司退休了後，拄好遇到盤古開天以來頭一擺，教育部主辦的鄉土語言教學
支援人員的認證考試，分做：河洛語組、客家語組、原住民語組‧我報名參加河洛語組
，無頭無尾，上尾工才去報名，報名後才開始尋參考資料來準備，嘛算真好運，通過筆
試，佮通過口試，佮去上課36點鐘，由各大學河洛語的研究教學學者來上課，最後，才
會當領到教育部發的證書‧共這年，嘛拄好有機會加入桃園市某國小的志工河洛語組，
投入透早7:50-8:30.的河洛語晨光教學，一直到即馬攏猶繼續喔！嘛有機會佇桃園市另
外的國小代課一個月，續落佇龜山鄉的國小擔任河洛語教學1年‧頭尾有教過2年3年4年
和6年的學生囝仔，加減有淡薄仔感想和心得，講出來互逐家來做參考‧
好歹攏有，先講需要改進的缺點：
(1).教材無統一‧共一間學校，低年級、中年級、高年級，逐年級的課本攏無共間出版社
，學生升級了後，內容、音標、拼音、用字等等，無法度連續落去，每年級親像愛由頭
學起共款，學生囝仔會亂去，教學的先生嘛真頭大煩惱啊！這是真可惜的代誌，共一間
學校就無法度整合，毋知影問題出佇叨位？
(2).漢字的用字無統一‧這是中央政府懸層的責任，過去的100年，由日本殖民統治續落
國民黨的佔領戒嚴統治，禁止母語的使用，獨推華語﹝北京話﹞做國語；這幾年來，才
開始漸漸注重搶救母語的問題，毋過，逐間出版社的內容、音標、拼音、用字等等，攏
無共款，每一位學者專家對用字的認定嘛攏有意見，聽講教育部準備整合學者專家的意
見，公佈統一的漢字用字，這是好消息，愛趕緊做，互全台灣的學校、出版社、媒體、
民眾等等，用字有依據，會統一使用，逐家慣習成自然，漸漸就普遍囉！尤其河洛語的
漢字，80%以上攏是漢字，其他的平埔族語和外來語﹝包括：葡萄牙語、西班牙語、荷蘭
語、日本語、英語等﹞，看是用借音、訓讀抑是用羅馬字母標示攏會當討論啊！依照學者
專家對用字的多數認定，全民就會接受啦！
(3).音標無統一‧目前有2大系統，注音符號和羅馬字母‧咱的小學生，開始讀冊認字時，
攏愛學注音符號，教育部佇1950/06.有公佈一套“台灣方音符號”，就會當用來做河洛語
的音標教學，並﹝勿會﹞增加學生囝仔的負擔，嘛真緊就讀會曉，和學華語共款，嘛﹝勿會
﹞起衝突‧這對先生抑是學生囝仔，佇教學上是一兼兩顧啊！另外是羅馬字母拼音系統：
自400年前的教會開始用羅馬字母拼出河洛語音，即馬叫做教羅；後來，有改良式的羅馬字
母拼音出現，叫做台灣羅馬字母拼音﹝TLPA﹞；嘛佮發展出通用拼音等3大系統；佇中國
搁有漢語拼音系統‧前的3大系統，各有優點和缺點，其實是小可仔所在無共款爾爾，互相
競爭甲真厲害，為著互外國人卡簡單來學河洛語，整合統一出一套羅馬字母拼音就好啦！
互教、學双方面攏有統一的標準，好教緊學嘛卡﹝勿會﹞混亂去‧無採用的另外2系統，
學者專家﹝要卜﹞查文獻資料嘛是用會著，免驚講互人放﹝扌速﹞‧嘛是有保存的必要‧
最後就是全國一套“台灣方音符號”和一套統一整合的羅馬字母拼音，用久就慣習啦！就
親像日本語文共款有：平假名、片假名和羅馬字母拼音；通行國內外攏真順序無問題‧
(4).教材課本的內容愛隨年級調整編排，由淺到深；而且互學生囝仔了解傳統文化習俗
以外，嘛愛符合即馬的時代環境，將現代的生活相關事、物，編入去課本內，學生囝仔
才會感覺有趣味、有切身感，才有興趣來學、來讀、來講‧
(5).教學時間實在講一禮拜一節傷少，當然，一項語言互統治者前後禁﹝要卜﹞近佰年囉
，即馬會當再恢復，有總是比無卡好啦！本來是怨無，無怨少；毋過，既然行出一小步，
﹝勿會﹞當搁行回頭，咱愛卡大步甲行進前，所以，愛想辦法來爭取，增加教學的時間，
部份的學校長就有利用透早自修時間，由志工組員配合支援，推行晨光河洛語教學活動，
互學生囝仔增加學習的時間；嘛有的學校辦各式各樣的活動，像：演講比賽、民俗節日
的表演、每禮拜的一工做河洛語日等等，互學生囝仔歡喜參加，引起學生囝仔學河洛語
的興趣‧才會當搁卡落實重視河洛語的教學政策，嘛是逐家的福氣‧
(6).中央政府的母語政策愛搁卡加強，併要求逐種媒體來配合，電視台、廣播電台、報紙
、雜誌抑是翁仔冊，攏來支持母語政策，尤其是報紙，愛有河洛語文版：報大細新聞消
息、長、短篇的小說、散文、七字仔詩、現代詩笑科集等等，這對統一用字的推展非常
有幫助‧
﹝禾黑﹞的部份講真濟，換來講會當褒的部份：
(1).講河洛語的人口數佇全世界超過6千萬人，在世界語言的排名嘛猶真頭前喔！佇台灣
這幾年來會當重視緊來搶救，重新推行母語政策，將﹝要卜﹞失去的母語緊救倒轉來，
這是非常正確佮真會互人婀咾的大代誌‧這嘛是愛這塊土地的人，一代一代打拼的結果‧
(2). 學生囝仔漸漸會曉講河洛語﹝抑是其他的母語﹞，嘛卡愛講河洛語囉！講的人一年
比一年有增加，講的品質嘛攏有提升進步‧學校長愈重視的，學生囝仔進步愈濟‧這是
真好的現象‧
(3). 囝仔佇學校學母語，下課轉去茨裡，和阿公、阿媽、阿爸、阿母用母語講話，互相的
親情搁卡親密‧無形中互隨人隨家好的傳統，會當繼續保存傳落去‧
(4).互台灣囝仔開始認識這塊土地的文化、歷史、地理、人文風俗等等，抑無，真濟人知
影東京、西京、南京、北京佇叨位，毋知影東港、西港、南港、北港佇叨位？這是真正悲
哀的事實；毋過，即馬起﹝勿會﹞啦！咱的序細對台灣開始卡有認同，漸漸增加愛惜台灣
這塊土地‧這嘛是咱逐家的福氣啦！
全站熱搜
留言列表
