台語文~~~~~歇睏傷久亦是悿~~~~~遊子
即次的農曆過年歇睏9工，是最近10外年來上久的年假，真濟人歇睏完感覺真悿，這就是
”長假期症候群”(Long vacation symptom)‧毋管是出國旅遊、國內旅遊，攏是差不
多啦！
咱來看國內旅遊：有的是塞車塞到悿，高速公路毋管是中山高速公路、福爾摩莎高速公路
、蔣渭水高速公路等等，車流量攏是創記錄啦！過年日開始塞到初七日，以初三的294萬
台上濟；雪山磅空雖然過了高峰期，猶原繼續塞，所以，高速公路工程局的官員評估以後
連續歇睏2工的假日攏需要管制？逐所在的風景區嘛是每工塞車，由台灣頭到台灣尾，無
1位無塞車的啦！顛倒在台北市內變空城，好駛、好行、好停車‧
出國旅遊的情況：過年前連續3間旅行社喝倒，負責人收錢無訂位就落跑，予幾仔千人的
年假受影響和心情受打擊；準時出國的人，由桃園國際機場開始塞到國外的機場、飯店旅
館、百貨公司和風景區，才復塞倒轉來桃園國際機場；在國外拄到非常濟的台灣人、香港
人、中國人等，中國人在經濟開放發展後，出國旅遊的高幹和收入好的人一直增加，講話
大聲展有錢，不過，予對方無好印象，提供的服務就降低，所以，台灣人在即時陣嘛受到
”拳頭屁”，像在日本國內的服務人員，聽到旅客講華語，服務品質就打折‧無法度啦！
抑無，台灣人在國外上好講台語、日語亦是英語，卡袂食虧啦！
無出門的和親朋好友打牌、唱卡拉OK、飲春酒、食好料，透暝透日，連續幾工落來，嘛是
悿甲會khoo雞袂歕火‧另外一陣人是服務大眾加班到悿，親像：交通界上班的人、警察、
軍人、演藝界的人等等，真正予人敬佩‧
雖然講：歇睏充電是為著繼續會使行復卡遠的路途，因為長期工作無歇睏，顛倒予人變戇
呆，工作效率降低；不過，歇睏日傷長又無好好仔計畫，歇睏完顛倒悿，按呢共款無好啦
！所以，認真拍拼工作，拄仔好的歇睏，實在是一項大學問啊！
全站熱搜
留言列表
