jimmycmlin的部落格

用藥保健~~~~~困擾的白帶~~~~~遊子
定定互查某人造成困擾的白帶問題，其實正常的白帶是由查某人陰道所分泌出來的
物件，佇健康正常人所分泌出來，應該是少量、白色半透明、無臭味，有保護陰道
壁黏膜的作用‧一般佇生理期前後、排卵期抑是妊娠期時，量比較會卡濟，若是無
其他的症頭，這攏算是正常生理性白帶，根本毋免治療，無需要煩惱‧
不過，抑是色緻無共，有時變做青色、赤色、黃色、白色、烏色等等；量又比平常
時加真濟，亦是變做卡黏、卡膏親像膿膏，有時是變做水水的款，有時又伴著惡臭
味，嘛會引起陰部癢、燒熱的感覺，會感覺跤酸腰疼，下肚脹疼等等的症頭，即陣
的病症佇中醫來講：就是帶下病啦！
佇中醫的立場分做內和外2方面來看帶下病；外是卡倚西醫的診斷治療方式，判定
是由外來病菌造成的，包括：陰道毛滴蟲(Trichomonas)、念珠菌屬(Candidas)
、生菇的黴菌屬(Fungus) 、淋病菌(Gonococcus)等等，引起生殖器官的發炎、
發病，佇中醫歸屬做“肝經溼熱”‧另外，內來講，是體內組織的病變引起，親像
生殖器官的腫瘤、癌症等等，這佇中醫歸屬做“脾虛”帶下‧
治療方式：抑是病菌造成的生殖器官的發炎，愛先互醫生診斷，有時陣愛提患者的
陰道分泌物，做培養、檢驗，確定是dor一種病菌引起的，才會當正確用藥仔治療
；治療時，愛親蜜做伙的2人同齊食藥仔治療，才有法度預防“乒乓感染”，治療
完全，這是真重要，愛注意的治療方式；另外，是查某患者用外用塞劑(栓劑) 來
治療，治療期3-7工，無一定，不過，一定愛照規定的工數，準時用藥仔‧抑是體
內組織的病變引起，食藥仔治療以外，可能愛配合外科方式處理治療‧
按怎來預防無正常的白帶發生？佇陰道內和喙空內、鼻空內、腸道內共款，平常時
嘛有一寡仔菌佇內面，咱將in叫做益菌，有維持相關體內組織，菌種平衡的保護作
用；所以，佇平常時毋通無代誌，用殺菌藥水、清潔藥水沖洗甲傷清氣，顛倒破壞
菌種平衡，卡會引來外來病菌侵入、增加，出現無正常的白帶症頭‧平常時卡mai
食寒冷的食物，工作壓力、stress毋通傷大，保持運動的好習慣‧穿著愛卡通風、
寬鬆的衫仔褲，像真合身、an篤篤的牛仔褲，卡mai穿卡好喔！