用藥保健~~~~~予蜘蛛放尿和皮蛇~~~~~遊子
咱嘛定定看到有人鼻子和喙的周圍有紅斑、水疱、破皮，民間將伊叫做：予蜘蛛放尿、予la ghia suan
尿‧有人是在頭面、身軀有真濟水疱，一大zua，予人感覺真疼又驚惶，民間將伊叫做：皮蛇、綑身蛇‧
為什麼會發生按呢的症頭？
其實予蜘蛛放尿就是醫學診斷上的單純性疱疹(Herpes simplex)；皮蛇就是醫學診斷上的帶狀疱疹
(Herpes zoster)‧引起這兩種症頭的病毒(Virus)和喙破、臭喙角的病毒相共類，攏是由病原菌
Herpesvirus Varicellae所造成，只是引起這3種症頭的病毒分類結構無共款，所以，發作的部位無共‧
這3種症頭攏發作在抵抗力降低、免疫不全、發重病後(淋巴腺瘤、白血症、逐類癌症等等)、受外傷後、受
放射線療法照射等等的人‧
單純性疱疹又分做2型；在鼻子和喙的周圍算是第1型，在下身生殖器官的周圍算是第2型‧原則上是固定發
作在原本已經發作過的所在，(勿會)走來走去，一般如果無特別治療時，兩禮拜內嘛會慢慢仔好起來；有接
受適當治療時，會當縮短艱苦的時間；不過，過了一段時間，又是工作無閒、壓力大、體力透支傷過頭悿時
，又會發作出來喔！亦有要注意的是：在發作的時陣，絕對毋通予另外一個人的鼻子和喙亦是下身生殖器官
相接觸到，抑無，第1型會轉變為第2型，第2型嘛會轉變為第1型，以後有可能變成頂面和下面同齊發作，是
復卡艱苦喔！
另外，帶狀疱疹的病毒是沿著身體的神經系統線路來行湠，會漸漸由一點變為一cok，又變為歸巡的帶仔形
，親像去予蛇綑著，歹看又痛苦，才會予人叫做皮蛇、綑身蛇‧發作時的頭仔幾工(第4 ~6工)會卡疼，在
第2~3工時，就會發疹湠到真厲害，叫做汎發性帶疹；有時伴有發燒畏寒，頭疼、全身無力、全身神經疼等
等情況，嚴重時需要蹛院，如果無好好來治療時，有可能轉變成水痘性肺炎，來造成死亡；發疹時大部份偏
歸爿，皮疹會先紅腫才轉變為水疱，卡嚴重又出現變為膿疱，到尾仔所有的水疱、膿疱才收縮結pi、痂，才
又漸漸落皮堅焦‧如果發作在頭殼、面上時，要注意毋通予侵犯到目睭，亦無有可能變成青瞑喔！一般發作
頭尾總共有3~4禮拜的受苦時間‧現此時的醫藥進步，用熱威黴素(Zovirax.200mg/Tab.學名是：
Acyclovir.)1工5粒連續食5工，是1個完整的療程，效果真好；需要蹛院時，就用共成份的注射劑‧對身
體衰弱的老大人，會當注射gama-Globulin0.5~1.0mg/Kg的藥量，來提高老大人的免疫力，預防汎發性帶
疹的發作‧一般人發作過以後，大部份的人就﹝勿會﹞復發作啦！即點和單純性疱疹是無共的‧
總是平常時要顧好家自的身體，時時維護家自的健康，保持好的運動三三制好習慣；因為”賺錢有數，性命
要顧”阿！
留言列表
