jimmycmlin的部落格

莊子講(78)~~~~莊子欲往生囉~~遊子
莊子身體欠安愈來愈衰弱，往生的時辰欲到啦！伊的徒生集做伙，圍在伊的
邊仔，討論按怎來厚葬伊‧
莊子瞭解徒生的心意，但是無認同徒生的想法，就真用力輕聲仔講：恁逐個
毋免按呢做啦！我死了後，用天地做棺(木郭)，用日月做雙璧，用天頂的星
辰做珍珠，用萬物做禮品，按呢已經真週全囉！甘猶有什麼款的葬儀比這復
卡好？
伊的徒生真毋甘，合聲講：如果照按呢做，先生你會予烏鴉、獵鴞食掉啊！
莊子接落去輕聲仔講：在地面上會予烏鴉、獵鴞食掉，在土跤下會予蛄螻、
蚼蟻食掉；恁為什麼欲將烏鴉、獵鴞的喙內，搶過來予蛄螻、蚼蟻食？按呢
甘是真正公平？生、病、老、死是人生的過程，死亡只是一種自然肉體的消
散、變化，上尾仔會變成怎樣，就交予大自然去處理啦！
所以講：親像莊子是真正開朗、豁達、任何事誌攏看真正開，在生時的為人
處事是按呢，到欲往生猶原無改變‧即馬，除了土葬、火葬、天葬以外，嘛
有海葬、樹葬等等，不過，電視報導有公司替人將骨灰用高溫燒做鑽石，1
克拉需要開60萬箍，這是物化思想的層次啦！咱mai去討論‧以莊子的思想
，實在值得咱來好好仔學習‧
註：以上莊子講由第(1)~(78)篇，用台語文來解說，已經到一個崁斬，由
2005.10.24.~2006.05.23.拄好用了7個月的時間，感謝入來參閱的朋友
，感謝！