jimmycmlin的部落格

臺語文：時行

咱定定會聽人講：伊真愛綴時行！逐家攏會愛綴時行⋯.有人是跤手緊，攏走佇時行的頭前，有人是青盲牛，憨憨仔綴人時行。到底是佇時行什麼？時行是什麼代誌啊？

其實時行並毋是現此時才有，自咱人類的生活歷史起頭到今，亦無論是個人、族群、地區、國家、全世界⋯攏會出現的代誌，簡單講：時行就是咱的生活方式。

時行其時是綴著技術的進步，工具的改變，思考的調整，宗教信仰、社會教育、科學的研究發現⋯等等，所以，時行本身就是ㄧ直改變，唯一無變的就是變。

親像咱個人生活的：食、穿、蹛、交通、娛樂⋯等等來看，古早無穿衫，用樹葉仔、樹皮、獸皮等來遮身軀，後來有棉花、蔴紗、蠶仔絲來做衫仔褲，長衫馬褂，長短裙，才閣色緻、花樣的設計變化。

古早的神話故事，是咱人的想法創新，後來才一項一項變成真，親像；千里眼佮順風耳，就是電視、電話機，閣進步為電腦，逐家綴著使用，亦算時行啦！

騰雲駕霧就是熱汽球、飛行船、飛行機、火箭、太空船、人造衛星⋯等，這是國家級的時行競爭力的代誌。

古早時代查某囡仔愛綁跤，抑無嫁袂出去；南太平洋島國的查某是愈大箍愈嫷，非洲有人掛鼻環、頷仔頸環、大耳環才是嫷，有人頭鬃染五彩色，有人留長頭鬃、有人削短短、亦有人剃光頭、真正是派頭在人激，欲綴時行在人選啦！

現此時全世界攏是晏婚、慢生、做頂客族，進步國家攏有少子化、高齡化問題，半世紀前是加人加福氣！加一口喙只是加一副碗箸，這是一念之差，社會上的時行著是無共囉！

所以，咱著瞭解時行就是咱生活方式，是綴著社會環境的變遷，一直佇改變，欲綴時行抑毋綴，亦是由在你啦！