jimmycmlin的部落格

新聞辭典~~~~~狂牛症~~~~~遊子 2009.06.27.
媒體報導：因為狂牛症關係，自2003年12月24日禁止進口美國牛肉，最近聽講政府欲全面恢復開放進口美國牛肉‧什麼是狂牛症？
狂牛症佇醫學上叫做牛隻海綿狀腦病變，亦叫做新型庫賈氏症‧上早是1986年佇英國發現到的新型動物傳染病，當時是因為牛隻食到的飼料，是用受到感染的羊骨亦是牛骨磨做灰，後來爆發為大流行的狂牛症‧
佇1996年，英國頭一擺發現到人類感染到新型庫賈氏症‧經過詳細調查研究，這是佮牛隻的狂牛症有關係，才引起全世界對歐洲國家出產牛肉安全的煩惱佮疑慮‧
新型庫賈氏症平均發病的年歲較少年，主要的症頭有：焦慮、腳手會麻、漸漸來失智等等現象，平均的存活率大約是14個月‧
新型庫賈氏症佮傳統人類的庫賈氏症並無共款，傳統人類的庫賈氏症是發現佇1920年代，屬一種神經退化性的病症，佮狂牛症無關係，伊起頭是會出現記智衰退、動作行為佮平常時無共、行路腳步未穩等等，親像失去記智的症頭，後來腦部組織亦漸漸退化死亡；大部份發生佇60歲以上的老大人，發病以後大部份拖未過3年。