臺語文：荷蘭病
雖然武漢肺炎病毒疫情繼續傳湠全世界，各行各業攏受著濟少的影響，當然亦有受著幫贊的行業，媒體報導咱臺灣的人均GDP達到3萬5千5美元，超過日本佮韓國，可能是東亞的頭名！毋過，也有學者專家認為，這亦有可能出現「荷蘭病」喔！逐家可能是霧煞煞，什麼是「荷蘭病」？
其實「荷蘭病」並毋是醫療上的病症，伊是指一個國家經濟發展的特異現象.歐洲的荷蘭，佇北海域發現著大油氣田，予國家的財政收入雄雄增加真正濟，外匯快速增加，in7國家的銀票升值，由國外進口入來的原材料物資變較俗，欲賣出去國外的物件變較貴，國內消費市場價數是較俗，對銷費者有利，對國內的生產產業利純減少去；因為能源業吸引人才去，予其他逐行業沓沓欠缺跤手，揣無人來做，變空洞化去，佇國際市場的經營愈艱苦，只因為能源業的大好成長，結果影響著其他的製造生產業，成本增加，出口困難，這時陣政府抑是無適時推動正確的調整方案，社會造成貧富差距愈來愈大，普遍地百姓無法度感受到個人所得的增加，社會無安定，早慢也會出問題！
類似的經驗，佇北歐的挪威亦發生過，毋過挪威政府真緊就調整政策，限縮石油能源政策，限量出口，無欲靠單一的能源發展做國家唯一的發展目標，予其他行業有生存空間，繼續發展成長，予國家社會渡過危機。
毋過，佇南美洲的委內瑞拉就無赫尼阿好運囉！伊亦曾經是全世界儲備石油上濟的國家，石油輸出的收入，亦是南美洲上好額的國家，國民的福利、國家的建設，攏是大出手，毋過，其他行業無起色；有一工，世界市場的石油崩盤，石油銷無路，價數一丈差九尺，政府的財政預算案攏拍歹了了！外匯一直減少，銀票變薄，外資逃離，全國是悽慘落迫，原本就百業不興，規國家散甲只賰石油爾爾。
咱臺灣的科技業發展著真好，半導體產業是咱的護國神山，這三年來的疫情嚴重損害真濟行業，尤其民生產業服務業，世界逐國的經濟增長放慢，亦有袂少是倒退擼，毋過，咱臺灣是表現真好，防疫政策全國一心，控制疫情無湠傷緊傷嚴重，國內的經濟是有受較大影響，國外的外銷市場猶有好成績單，所以，整體的國民平均所得有增加，才會贏過日本佮韓國.
最近幾年來，佮半導體產業相關的月給賞金攏真好，工廠所在附近的房地產、服務業亦攏真發展，所以，毋是相關學系的畢業生，亦攏一直欲進入去上班做穡，連社會科的學生嘛共款！科學園區以外的百業，是慘慘慘，需要政府協助、補助、救濟，一個臺灣出現兩種現象，有歇無薪假、予頭家裁員、欲換頭路歹揣、低薪、工作時間長⋯，大部分的人無法度分享到經濟成長的成果，食粒無，lim 湯也無，無感受到平均所得增加的快樂，顛倒感覺物價一直起，閣一起無回頭，.
所以，學者專家大聲提醒：科技產業佔孤枝，社會上好額散愈差愈大，中產階級拍無去，變成M型雙頭尖的形體，就親像「荷蘭病」欲出現的前兆，呼籲政府愛緊推出調整計劃，毋通像委瑞內拉的慘樣，愛學挪威行出新的路途，才是全國全民之福！
