close
糖分佇咱體內是咱日常逐種活動的能量來源，親像汽車愛食油才會走共款，不過，
體內的糖分傷懸傷低攏對身體無好；傷懸時就叫做糖尿病，傷低時就叫做低血糖症‧
(A).糖尿病：
簡單講糖尿病是一種因為體內的胰島素分泌不足，抑是體內的細胞無法度利用胰島素
，造成血中的糖分無法度互體內的細胞完全吸收利用的病症‧糖尿病患者表現出來的
症頭有：食濟、﹝口林﹞濟、尿濟的現象‧不過，毋是所有的糖尿病患攏安呢‧抑準
控制無好，這種慢性病長期了後，會發生真濟併發症，像：目睭，腰子、心臟、神經
系統、血壓懸等等，攏會產生變化，愈來愈嚴重喔！
治療糖尿病的藥仔分做食的藥仔和注射的‧普通對第一型糖尿病患者，一定愛用注射
的胰島素‧對第二型糖尿病患者，會當先用食的來治療，抑是用食的無法度控制，就
需要改用注射的胰島素‧
其實和其他的病症共款，正確治療的觀念是：定期的運動、定時用藥仔和控制飲食‧
3大項平平重要‧抑準﹝勿會﹞記得食藥仔抑是注射，千萬毋通一擺用2倍的藥仔；
時間抑是過真久，就毋免補食、補注；嘛毋通隨便增加抑是減少藥量‧用藥有無清楚
的時就問藥師；控制飲食方面就和營養師討論請教‧如果有定期的運動，飲食控制就
毋免赫呢阿嚴格‧
另外愛注意的所在有：萬一受傷時，傷口愛好好處理，尤其跤部份，毋通拖傷久延誤
治療時機，才﹝勿會﹞造成遺憾‧出外運動抑是旅遊時，身邊愛隨時帶餅和糖仔，準
備血糖傷低時會當隨補充食用‧這2項攏是真要緊的代誌‧
(B). 低血糖症：
原因可能是控制血糖的藥量超過重；飲食無控制好，食傷少；運動了後體力透支，無
食物好隨補充等等‧
出現的症頭有：腹肚饑餓艱苦、目睭看﹝勿會﹞清楚、拼汗、頭疼、頭眩、心跳卡緊
、喙舌會麻等等‧
預防的方法：糖尿病的患者一定愛照時間照藥量用藥；出外運動抑是旅遊時，身邊愛
隨時帶餅和糖仔，準備血糖傷低時會當隨補充食用‧嘛愛尋時間請教醫師有發生血糖
傷低的代誌，是毋是需要調整藥仔的種類抑是藥量‧
愛特別注意的是：絕對毋通將任何物件去飼已經昏迷的患者，而且愛緊送去病院才對
全站熱搜
留言列表
