臺語文：閒
佇咱臺灣日常生活中，南部人看著台北人佇路咧行路是有夠緊，毋過抑是去到東京的街仔路，逐家行著閣較緊，尤其佇地下鐵站時，看著每一個人攏行親像飛耶！咱的跤步有影攏綴袂著。
抑是，去到東部的臺東、花蓮、日本北海道、歐洲國家的逐所在，會感覺逐個人生活攏真自在悠閒、行路、做穡、坐火車、坐船、看展覽、用餐時，攏沓沓仔是，排隊照順序毋免急，其實急亦無效，你急邊仔的人攏穩心仔來，佇彼的環境感染之下，跤步自然放慢囉！
想著退伍拄踏入社會食頭路時，過著親像7-11的生活，透早7點以前出門，暗時11點以後，時常是過翻點才通歇睏，每工行東往西，一件代誌辦完，紲落隨接另一件，規工一個人親像干樂踅無停、轉無歇，三頓定定無照時間食，有時又是一頓久久，兩頓相拄；因為緊張無閒壓力大，睏眠不足、欠運動，身體亦三不五時發出警訊：胃腸無順、目睭白出血、心律不整、腰酸背痛、耳仔吱吱聲⋯等等，假日亦時常愛加班，有時又閣報名去進修聽課，抑無，驚佇職場的競爭會綴人袂著。
到人生的某一個坎站，才雄雄悟出，閒是一種心境，一種想法，一念之差，會當真閒抑是無閒；毋通將家己看做非常重要的人，其實世界上的任何團體組織，無講非某一個人袂用咧.對應該負責的工課，盡心盡力，照進度的要求來達成目標就可以。
佇日常生活中，凡事將跤步放慢，時間的分配，公私分明，毋通摸非，亦無需要虧欠家己佮茨內的親人，mai3 為著趁閣較濟錢，做拼命三郎，留著青山在，免驚無柴燒。人生無法度十全十美，目標愛由無共角度來設定，福祿壽、真善美，看破紅塵入世的名佮利，揣著心身靈健康的身體，才是有意義的人生。
人講：大隱隱於市。所以，共款是大閒閒於市。想法調整佮落實佇日常生活中，毋免搶欲過黃燈，毋通逐項想欲爭頭前，日常代誌照常做，家己的時間加真濟，陪序大人開講、增添翁仔某的感情、陪伴囡仔歡樂成長、欲遊山玩水、看藝術創作展覽、聽音樂會、享受芳醇咖啡、泡著茶米茶、食美食、走揣巷仔內的料理、保持運動好習慣、加減上網路吸新智識、招親朋老友的聚會、同窗會，⋯。
一念之差，有一粒閒的心，一屑仔閒的心情，放空的日子完全變無共款，咱蹛的所在就是樂土，無輸佇國外悠閒的環境，準做予人認為是「英英美代子」麼無要緊！
留言列表
